24629 ۔۔۔ حضرت عبداللہ ابن عباس (رض) کی روایت ہے کہ ان سے ایک آدمی نے روزہ کے متعلق دریافت کیا انھوں نے جواب دیا : میں ضرور تجھے ایک حدیث سناؤں گا جو مجھے بہت اچھی طرح یا ہے اگر تم رب تعالیٰ کے خلیفہ حضرت داؤد (علیہ السلام) کے روزے کا ارادہ رکھتے ہو تو وہ لوگوں میں سب سے زیادہ عبادت گزار سب سے زیادہ بہادر اور دشمن کے ساتھ جنگ کے وقت بھاگتے نہیں تھے اور بہتر (72) آوازوں میں زبور پڑھتے تھے اور جب قرات کرتے تو بخار زدہ آدمی بھی فرط مسرت سے جھوم اٹھتا تھا اور جب آپ (صلی اللہ علیہ وآلہ وسلم) خود رونا چاہتے تو خشکی وتری کے جانور آپ کی عبادت گاہ کے اردگرد جمع ہوجاتے تھے اور خاموشی سے آپ کی قرات سنتے تھے اور ان کے ساتھ ساتھ روتے بھی تھے رات کے آخری حصہ میں اللہ کے حضور گڑگڑا کر سجدہ ریز ہوجاتے تھے اور اپنی حاجت طلب کرتے نیز رسول کریم (صلی اللہ علیہ وآلہ وسلم) نے ارشاد فرمایا ہے کہ میرے بھائی داؤد کا روزہ افضل ترین روزہ ہے وہ ایک دن روزہ رکھتے تھے ایک دن افطار کرتے تھے اگر تم داؤد کے بیٹے سلیمان (علیہ السلام) کا روزہ رکھنا چاہتے ہو تو وہ ہر مہینہ کے شروع میں تین روزے وسط میں تین روزے اور آخر میں تین روزے رکھتے تھے چنانچہ سلیمان (علیہ السلام) مہینہ کو روزوں سے شروع کرتے وسط میں بھی روزے رکھتے اور مہینے کا اختتام بھی روزے سے کرتے تھے اگر تم عیسیٰ (علیہ السلام) کا روزہ رکھنا چاہتے ہو تو وہ عمر بھر کے روزے رکھتے تھے اور افطار نہیں کرتے تھے پوری رات (عبادت کے لئے) بیدار رہتے اور سوتے نہیں تھے اور بالوں سے بنے ہوئے کپڑے پہنتے تھے اور جو تناول فرماتے تھے شام ہوتے ہی گھر میں داخل ہوجاتے آئندہ کل کے لیے کچھ تھوڑا بہت بچا لیتے تھے جب شکار کا ارادہ کرتے تو تیراندازی کرتے تھے ان کا نشانہ خطا نہیں ہوتا تھا جب بنی اسرائیل کی مجالس کے پاس سے گزرتے تو ان میں سے اگر کسی کو آپ سے کوئی کام ہوتا اس کا کام پورا کردیتے سورج کو دیکھتے اور جب غروب ہوجاتا تو اللہ تعالیٰ کے حضور صف بستہ ہوجاتے حتی کہ سورج کو طلوع ہوتے دیکھ لیتے حضرت عیسیٰ (علیہ السلام) کی یہی حالت رہی حتی کہ اللہ تعالیٰ نے انھیں اپنی طرف اٹھا لیا اگر تم عیسیٰ (علیہ السلام) کی والدہ مریم کا روزہ رکھنا چاہتے ہو تو وہ دو دن روزہ رکھتی تھیں اور ایک دن افطار کرتی تھیں اور اگر تم خیر البشر محمد عربی نبی قریشی ابوالقاسم (صلی اللہ علیہ وآلہ وسلم) کا روزہ رکھنا چاہتے ہو تو آپ (صلی اللہ علیہ وآلہ وسلم) ہر مہینہ میں تین دن روزے رکھتے تھے اور فرمایا کرتے تھے کہ یہ عمر بھر کے روزے ہیں اور یہ افضل ترین روزے ہیں۔ (رواہ ابن زنجویہ ابن عساکر) کلام : ۔۔۔ حدیث ضعیف ہے چونکہ اس کی سند میں ابوفضالہ بن الفرج بن فضالہ ضعیف راوی ہے۔