24635 ۔۔۔ حضرت ابی (رض) کی روایت ہے کہ ایک مرتبہ حضور اکرم (صلی اللہ علیہ وآلہ وسلم) کی خدمت میں ایک اعرابی حاضر ہوا اس کے پاس بھونا ہوا خرگوش اور روٹی تھی جسے اس نے نبی کریم (صلی اللہ علیہ وآلہ وسلم) کے سامنے رکھ دیا پھر اعرابی بولا : میں نے خرگوش پر خون پایا تھا حضور اکرم (صلی اللہ علیہ وآلہ وسلم) نے فرمایا : اس میں کچھ ضرر کی بات نہیں (بلاترد) اسے کھاؤ اعرابی سے فرمایا : تم بھی کھاؤ اس نے عرض کیا ، مجھے روزہ ہے فرمایا : کیسا روزہ ہے ؟ عرض کیا ، مہینہ میں تین دن روزہ رکھتا ہوں ، حکم ہوا حضور اکرم (صلی اللہ علیہ وآلہ وسلم) اگر روزے رکھنا بھی چاہتے ہو تو ایام بیض کے روزے رکھو یعنی 13، 14، 15، تاریخوں میں ۔ (رواہ النسائی ، وابن جریر) کلام : ۔۔۔ امام نسائی (رح) کہتے ہیں یہ حدیث دراصل حضرت ابوذر (رض) سے مروی ہے جب کہ روایت میں ابی کا ذکر ہے اس میں مناسب تاویل یہ ہوسکتی ہے کہ کتاب سے ” ذر “ کا لفظ ساقط ہوگیا اور ” ابی “ باقی رہا اسے ” ابی (ذر) پڑھنے کی بجائے ابی پڑھا گیا رواہ ابن جریر کہتے ہیں یہ حدیث محدثین کی ایک بڑی جماعت عمار ابی اور ابوذر (رض) سے روایت کرتی ہے۔