25613 ۔۔۔ ” مسند عبداللہ بن عمرو بن العاص “۔ حضرت عبداللہ بن عمرو (رض) روایت کی ہے کہ نبی کریم (صلی اللہ علیہ وآلہ وسلم) نے ارشاد فرمایا : جس شخص نے اپنے مال واولاد سے خوف زدہ ہوتے ہوئے اپنے پڑوسی کے آگے دروازہ بند رکھا یہ شخص (کامل) مومن نہیں ہے ، اور وہ شخص بھی (کامل) مومن نہیں جس کا پڑوسی اس کی شرارتوں سے بےخوف نہ ہو ۔ کیا تم جانتے ہو پڑوسی کے حقوق کیا ہیں ؟ چنانچہ تمہارا پڑوسی تم سے مدد طلب کرے تم اس کی مدد کرو ، جب تم سے قرض طلب کرے تم اسے قرض دو جب وہ محتاج ہوجائے تم اس کی طرف رجوع کرو جب بیمار پڑجائے تم اس کی بیمار پڑسی کرو جب اسے بھلائی نصیب ہو تم اسے مبارکبادی دو ، جب اسے کوئی مصیبت پہنچے تم اسے تسلی دو جب مرجائے تم اس کے جنازے کے ساتھ ساتھ چلو ، تم اس کی اجازت کے بغیر اپنی عمارت اس طرح نہ کھڑی کرو کہ اسے تازہ ہوا نہ آنے پائے ۔ اپنی ہنڈیا کی بو سے اسے اذیت مت پہنچاؤ البتہ اپنی ہنڈی میں سے اس کا بھی حصہ کرو ، اگر تم پھل خرید کر لاؤ اس میں سے اسے بھی ہدیہ دو اگر اسے پھل ہدیہ میں نہ دے سکو کم از کم اپنے گھر میں پھل چپکے سے لاؤ اور پھل لے کر تمہاری اولاد باہر نہ نکلنے پائے کہ اس کی اولاد پر رشک کرتے پھریں کیا تم جانتے ہو پڑوسی کے حقوق کیا ہیں ؟ قسم ہے اس ذات کی جس کے قبضہ قدرت میں میری جان ہے بہت تھوڑے لوگ پڑوسی کے حقوق ادا کر پاتے ہیں اور یہ بھی وہ لوگ ہیں جن پر اللہ کی رحمت ہو آپ (صلی اللہ علیہ وآلہ وسلم) صحابہ کرام رضوان اللہ تعالیٰ عنہم اجمعین کو برابر پڑوسی سے حسن سلوک کی وصیت کرتے رہے حتی کہ گمان ہونے لگا کہ آپ پڑوسی کو وارث ہی نہ بنادیں ، پھر آپ (صلی اللہ علیہ وآلہ وسلم) نے فرمایا : پڑوسیوں کی تین قسمیں ہیں ان میں سے ایک وہ ہے جس کے لیے تین طرح کے حقوق ہیں دوسرا وہ ہے جس کے لیے دو طرح کے حقوق ہیں تیسرا وہ ہے جس کے لیے ایک حق ہے چنانچہ وہ پڑوسی جس کے لیے تین طرح کے حقوق ہیں وہ مسلمان پڑوسی ہے ایک پڑوس کا حق اور دوسرا اسلام کا حق وہ پڑوسی جس کے لیے ایک حق ہے وہ کافر پڑوسی ہے اس کے لیے صرف پڑوس کا حق ہے ہم نے عرض کیا : یا رسول اللہ ! کیا ہم پڑوسیوں کو اپنی قربانیوں کا گشت کھلا سکتے ہیں ؟ آپ نے فرمایا : مشرکین کو اپنی قربانیوں کے گوشت میں سے کچھ نہ کھلاؤ ۔ (رواہ ابن عدی والبیہقی فی شعب الایمان، وقال فیہ سوید بن عبدالعزیز عن عثمان بن عطاء الخراسانی عن ابیہ والثلاثۃ ضعفاء غیر انھم متھمین بالوضع) حدیث 24891 نمبر پر گز چکی ہے۔