25710 ۔۔۔ زید بن اسلم اپنے والد سے روایت نقل کرتے ہیں کہ مجھ سے حضرت عمر (رض) نے فرمایا : اے اسلم ! دروازہ بند کر دو اور کسی کو بھی اندر نہ آنے دو پھر ایک روز انھوں نے میرے جسم پر نئی چادر دیکھی تو پوچھا کہ یہ تمہارے پاس کہاں سے آئے ؟ عرض کیا : یہ مجھے عبیداللہ بن عمر نے اوڑھائی ہے فرمایا : عبیداللہ سے لے لو مگر اور کسی سے ہرگز کچھ نہ لو ۔ پھر زبیر (رض) آئے میں دروازے ہی پر تھا انھوں نے مجھ سے اندر جانے کو کہا : میں نے کہا : امیر المؤمنین تھوڑی دیر کے لیے مشغول ہیں انھوں نے اپنا ہاتھ اٹھا کر میرے کانوں کے نیچے گدی پر ایک زوردار چپت ماری کہ میری چیخ نکل گئی میں عمر (رض) کے پاس گیا تو انھوں نے پوچھا کہ تمہیں کیا ہوا میں نے عرض کیا کہ مجھے زبیر نے مارا اور کل کا واقعہ بیان کیا عمر (رض) کہنے لگے زبیر نے ؟ واللہ میں دیکھتا ہوں ۔ حکم دیا کہ انھیں اندر لاؤ میں نے انھیں عمر (رض) کے پاس پہنچا دیا عمر (رض) نے پوچھا کہ تم نے اس لڑکے کو کیوں مارا ہے ؟ زبیر (رض) نے کہا : مجھے یہ گمان ہوا کہ یہ مجھے آپ کے پاس آنے سے روکتا ہے پوچھا کیا اس نے ک بھی تمہیں میرے دروازے سے واپس کیا ہے ؟ انھوں نے جواب دیا نہیں فرمایا کہ اس نے اگر تم سے کہا کہ تھوڑی دیر آپ صبر کیجئے کیونکہ امیرالمومنین مشغول ہیں تم نے اس کا عذر قبول کیوں نہ کیا ؟ واللہ ! درندہ ہی درندوں کے لیے خون نکالتا ہے اور اسے کھالیتا ہے (۔ رواہ ابن سعد )