2578 ۔۔ سورة البقرہ پڑھو۔ کیونکہ اس کا پڑھنا باعث برکت اور ترک کرنا باعث حسرت و ندامت ہے۔ باطل لوگ اس کی ہمت نہیں رکھتے۔ دو روشن سورتیں یعنی سورة البقرۃ و سورة آل عمران پڑھو۔ کیونکہ وہ روز حشر اپنے پڑھنے والوں پر بادل کی مانند چھا جائیں گی یا صف در صف پرندوں کے دو غولوں کی مانند آئیں گی۔ جب صاحب قرآن اپنی قبر سے اٹھے گا یہ قرآن خوبرو نوجوان کی شکل میں اس سے ملے گا اور کہے گا کیا تو مجھے جانتا ہے ؟ وہ نفی میں جواب دے گا۔ قرآن کہے گا میں تیرا ساتھی قرآن ہوں۔ میں نے تجھے گرمیوں کی شدید دوپہر میں تشنہ رکھا تیری راتوں کو بیدار رکھا اور ہر شخص دنیا میں تجارت کرکے اپنا نفع لیتا تھا۔ سو آج میں تیرے لیے ہر تجارت سے زیادہ نفع مند بنوں گا۔ پھر پروانہ سلطنت اس کے دائیں اور پروانہ ابد الآباد بائیں ہاتھ میں مرحمت کردیا جائے گا۔ اور اس کے سر پر وقار و عظمت کا تاج رکھ دیا جائے گا اور اس کے والدین کو ایسا لباس زیب تن کیا جائے گا۔ کہ ساری دنیا اس کی قیمت نہیں ہوسکتی۔ والدین کہیں گے یہ کس وجہ سے ؟ کا جائے گا تمہاری اولاد کے قرآن پڑھنے کی وجہ سے۔ پھر اس کو کہا جائے گا کہ قرآن پڑھتا جا اور جنت کے درجات اور بالا خانوں پر ترقی کرتا جاتا تو جب تک وہ پڑھتا رہے گا چڑھتا رہے گا خواہ سبک روی سے پڑھے یا دھیرے دھیرے۔ (مسند احمد، الدارمی، الرویانی، الضعفاء للعقیلی (رح)، المستدرک للحاکم، شعب الایمان بروایت عبداللہ بن زید اور بریدۃ عن ابیہ)
ابن ماجہ نے اس کو مختصر روایت کیا ہے۔