26803 ۔۔۔ حمران کی روایت ہے کہ سیدنا حضرت عثمان ذوالنورین (رض) نے جب سے اسلام قبول کیا ہر دن غسل کرتے تھے ایک دن میں نے نماز کے لیے وضو کا پانی رکھا جب وضو کیا اور فرمایا : میں نے چاہا تھا کہ تمہیں ایک حدیث سناؤں جسے میں نے نبی کریم (صلی اللہ علیہ وآلہ وسلم) سے سن رکھا ہے ، لیکن پھر مجھے خیال آیا کہ تمہیں وہ حدیث نہ سناؤں حکم بن عاص بولے : اے امیر المؤمنین ! اگر خیر و بھلائی ہو تو ہم اسے اختیار کریں گے ، اگر کوئی بری بات ہو تو ہم سے بچیں گے ۔ سیدنا حضرت عثمان ذوالنورین (رض) نے فرمایا : میں تمہیں سناتا ہوں چنانچہ ایک مرتبہ نبی کریم (صلی اللہ علیہ وآلہ وسلم) نے اسی طرح وضو کیا اور پھر فرمایا : جس شخص نے اس طرح وضو کیا اور اچھی طرح سے وضو کیا ، پھر نماز کے لیے کھڑا ہوا اور اہتمام کے ساتھ رکوع و سجدہ کیا تو اس نماز سے دوسری نماز کے درمیان ہونے والے گناہ اسے معاف کردیئے جائیں گے بشرطیکہ جب تک اس سے کوئی کبیرہ گناہ سرزد نہ ہو ۔ (رواہ احمد بن حنبل والبیہقی فی شعب الایمان)