26821 ۔۔۔ ” مسند براء بن عازب “ یزید بن براء بن عازب کی روایت ہے کہ میرے والد حضرت براء (رض) نے بیٹوں سے کہا : اکٹھے ہوجاؤ تاکہ میں تمہیں دکھاؤں کہ رسول اللہ (صلی اللہ علیہ وآلہ وسلم) کیسے وضو کرتے تھے اور کیسے نماز پڑھتے تھے ۔ چنانچہ آپ نے اپنے بیٹے اور گھر والے جمع کیے وضو کے لیے پانی منگوایا تین بار کلی کی ، تین بار ناک میں پانی ڈالا اور تین بار چہرہ دھویا پہلے تین بار دایاں ہاتھ دھویا پھر تین بار بایاں ہاتھ دھویا ، پھر سر کا مسح کیا اور ظاہر و باطن سے کانوں کا مسح کیا پہلے دایاں پاؤں تین بار دھویا پھر تین ہی بار بایاں پاؤں دھویا اور پھر فرمایا : اسی طرح رسول اللہ (صلی اللہ علیہ وآلہ وسلم) وضو کرتے تھے ۔ (رواہ سعید بن المنصور)