26883 ۔۔۔ ابو علقمہ کی روایت ہے کہ سیدنا حضرت عثمان ذوالنورین (رض) نے ایک دن وضو کے لیے پانی منگوایا پھر نبی کریم (صلی اللہ علیہ وآلہ وسلم) کے صحابہ کرام رضوان اللہ تعالیٰ عنہم اجمعین کی ایک جماعت کو بلایا آپ (رض) نے دائیں ہاتھ سے بائیں ہاتھ پر پانی ڈالا اور اسے تین بار دھویا ، پھر تین بار کلی کی ، تین بار ناک میں پانی ڈالا ، تین بار چہرہ دھویا پھر تین تین بار کہنیوں تک ہاتھ دھوئے ، پھر سر پر مسح کیا ، پھر پاؤں دھوئے اور اچھی طرح سے صاف کردیئے ، پھر فرمایا : میں نے رسول اللہ (صلی اللہ علیہ وآلہ وسلم) کو اسی طرح وضو کرتے دیکھا ہے جو وضو تم نے مجھے کرتے دیکھا ہے پھر فرمایا : جس شخص نے اچھی طرح وضو کیا پھر دو رکعتیں پڑھیں وہ گناہوں سے اس طرح پاک ہوجائے گا جس طرح اس کی ماں نے اسے جنم دیا تھا پھر کہا : اے فلاں ! کیا وضو اس طرح ہے ؟ اس نے جواب دیا : جی ہاں ! حتی کہ عثمان (رض) نے نبی کریم (صلی اللہ علیہ وآلہ وسلم) کے صحابہ کرام رضوان اللہ تعالیٰ عنہم اجمعین کو اس پر گواہ بنایا پھر فرمایا : تمام تعریفیں اللہ تعالیٰ کے لیے ہیں جس نے تمہیں میری موافقت کی توفیق دی ۔ (رواہ الدارقطنی)