26923 ۔۔۔ عمرو بن یخی مازنی روایت کی ہے کہ ایک شخص نے حضرت عبداللہ بن زید (رض) سے کہا : کیا آپ مجھے دکھا سکتے ہیں کہ نبی کریم (صلی اللہ علیہ وآلہ وسلم) کیسے وضو کرتے تھے ؟ جواب دیا جی ہاں ۔ چنانچہ عبداللہ بن زید (رض) نے وضو کے لیے پانی منگوایا اپنے ہاتھوں پر پانی ڈالا اور دو مرتبہ دھوئے پھر تین بار کلی کی اور تین بار ناک میں پانی ڈالا ، تین بار چہرہ دھویا ، پھر دونوں ہاتھ کہنیوں تک دھوئے پھر دونوں ہاتھوں سے سر کا مسح کیا پہلے دونوں ہاتھ آگے سے پیچھے لے گئے پھر پیچھے سے آگے اور سر کے اگلے حصہ سے ابتداء کی اور دونوں ہاتھوں کو گدی تک لے گئے پھر دونوں ہاتھوں کو واپس کیا اور وہاں لے آئے جہاں سے مسح کی ابتداء کی تھی پھر دونوں پاؤں دھوئے ۔ (رواہ عبدالرزاق ومالک واخرجہ البخاری کتاب الطھارۃ باب العمل فی الوضو واخرجہ مسلم کتاب الطھارۃ باب فی وضوء النبی صلی اللہ علیہ وآلہ وسلم)