27083 ۔۔۔ مجاہد روایت کی ہے کہ ایک مرتبہ ہم یعنی حضرت عبداللہ بن عباس (رض) کے اصحاب عطاء ، طاوؤس اور عکرمہ بیٹھے ہوئے تھے ، یکایک ایک آدمی آیا جبکہ حضرت عبداللہ بن عباس (رض) کھڑے نماز پڑھ رہے تھے آنے والا شخص بولا : کوئی مفتی ہے ؟ میں نے کہا : سوال کرو ، وہ بولا : میں جب بھی پیشاب کرتا ہوں پیشاب کے بعد کودنے والا پانی آتا ہے۔ (یعنی منی) ہم نے کہا : وہ پانی جس سے بچہ بنتا ہے ؟ بولا : جی ہاں ۔ ہم نے کہا : تمہیں غسل کرنا چاہیے ۔ وہ شخص ” انا للہ وانا الیہ راجعون “ کہتا ہوا واپس چلا گیا ۔ حضرت عبداللہ بن عباس (رض) نے نماز میں جلدی کی جب سلام پھیرا فرمایا : اے عکرمہ ! اس آدمی کو میرے پاس لاؤ، عکرمہ اس آدمی کو پکڑ کرلے آئے پھر حضرت عبداللہ بن عباس (رض) ہماری طرف متوجہ ہوئے فرمایا : ذرا بتاؤ تم نے اس شخص کو کتاب اللہ کی رو سے فتوی دیا ہے ؟ ہم نے کہا : نہیں فرمایا : رسول اللہ (صلی اللہ علیہ وآلہ وسلم) کی سنت کی رو سے فتوی دیا ہے ؟ ہم نے کہا : نہیں فرمایا کیا رسول اللہ (صلی اللہ علیہ وآلہ وسلم) کے صحابہ کرام رضوان اللہ تعالیٰ عنہم اجمعین کی تعلیمات کی رو سے فتوی دیا ہے ؟ ہم نے کہا : نہیں فرمایا : پھر تم نے کہاں سے یہ فتوی دیا ہے ؟ ہم نے کہا رائے سے یہ فتوی دیا ہے۔ حضرت عبداللہ بن عباس (رض) نے فرمایا : اسی لیے نبی کریم (صلی اللہ علیہ وآلہ وسلم) نے فرمایا ہے کہ ایک فقیہ ہزار عبادت گزاروں سے بھی زیادہ شیطان پر بھاری ہوتا ہے پھر حضرت عبداللہ بن عباس (رض) اس شخص کی طرف متوجہ ہوئے اور فرمایا : مجھے بتاؤ جب تمہیں وہ پانی خارج ہوتا ہے کیا تم اپنے دل میں شہوت پاتے ہو ؟ شخص بولا نہیں فرمایا : کیا تم اس کی وجہ سے جسم میں بےحسی پاتے ہو عرض کیا : نہیں ، فرمایا : یہ تو بس جسم کی ٹھنڈی ہے تمہیں اس کے بعد صرف وضو کرلینا چاہیے ۔ (رواہ ابن عساکر وسندہ حسن)