27140 ۔۔۔ عبیداللہ بن عکراش کی روایت ہے کہ ابو عکراش بن ذویب کہتے ہیں مجھے بنو مرہ بن عبیدہ نے اپنے اموال کے صدقات دے کر نبی کریم (صلی اللہ علیہ وآلہ وسلم) کے پاس بھیجا میں نبی کریم (صلی اللہ علیہ وآلہ وسلم) کی خدمت میں حاضر ہوا آپ مہاجرین و انصار کے درمیان بیٹھے ہوئے تھے میں آپ کے پاس اونٹ لے کر آیا جو ایک قطار میں چل رہے تھے آپ نے فرمایا : یہ کون شخص ہے ؟ میں نے عرض کیا : میں عکراش بن ذوئب ہوں فرمایا : اپنا شجرہ نسب بیان کرو۔ میں نے عرض کیا : عکراش بن ذوئب بن صرقوص بن جعدہ بن عمرو بن نزال بن مرہ بن عبیدہ اور یہ بنو مرہ بن عبید کے صدقات ہیں نبی کریم (صلی اللہ علیہ وآلہ وسلم) مسکرائے پھر فرمایا : یہ میری قوم کے صدقات ہیں : یہ میری قوم کے صدقات ہیں پھر آپ نے داغنی سے داغ لگانے کا حکم دیا اور یہ کہ انھیں دوسرے صدقہ کے اونٹوں کے ساتھ ضم کردیا جائے ، پھر مجھے ہاتھ سے پکڑ کر ام سلمہ (رض) کے گھر لے گئے آپ نے فرمایا : کچھ کھانا ہے ؟ چنانچہ ہمیں ایک بڑے پیالے میں ثرید اور اونٹ کی چربی دی گئی ہم کھانے میں مصروف ہوگئے نبی کریم (صلی اللہ علیہ وآلہ وسلم) بھی اپنے سامنے سے تناول فرمانے لگے ۔ میں نے برتن کے کناروں کناروں سے کھانا شروع کردیا رسول اللہ (صلی اللہ علیہ وآلہ وسلم) نے اپنے بائیں ہاتھ سے میرا دایاں ہاتھ پکڑ لیا پھر فرمایا : اے عکراش ! ایک ہی جگہ سے کھاؤ چونکہ یہ ایک ہی قسم کا کھانا ہے پھر ہمارے پاس ایک طبق لایا گیا جس میں انواع و اقسام کی تازہ کھجوریں یا چھوہارے تھے (عبیداللہ بن عکراش کو کھجوریں یا چھوہارے ہونے میں شک ہوا ہے) میں نے کھجوریں اپنے سامنے سے کھانی شروع کردیں جبکہ رسول اللہ (صلی اللہ علیہ وآلہ وسلم) کا ہاتھ پورے برتن میں گھوم رہا تھا پھر آپ نے فرمایا : اے عکراش ! جہاں سے چاہو کھجوریں کھاؤ چونکہ کھجوریں مختلف انواع و اقسام کی ہیں پھر پانی لایا گیا نبی کریم (صلی اللہ علیہ وآلہ وسلم) نے اپنے ہاتھ دھوئے پھر ہاتھوں کے ساتھ لگی ہوئی تری ہتھیلیوں ، بازؤں چہرے اور سر پر مل لی پھر فرمایا : اے عکراش ! آگ سے متغیر ہوجانے والی چیزوں کی وجہ سے اسی طرح کا وضو کیا جاتا ہے۔ (رواہ ابن النجار)