27344 ۔۔۔ مجاہد کی روایت ہے کہ مہاجرین و انصار کا موجب غسل کے متعلق اختلاف ہوگیا ، انصار کہتے تھے کہ پانی سے پانی واجب ہوتا ہے۔ (یعنی منی سے غسل واجب ہوتا ہے) جبکہ مہاجرین کہتے تھے کہ جب شرمگاہ دوسری شرمگاہ کو مس کر جائے تو غسل واجب ہوجاتا ہے۔ دونوں فریقین نے فیصلہ کے لیے سیدنا حضرت علی المرتضی (رض) کو ثالث تسلیم کیا اور کیس اس کے پاس لے آئے سیدنا حضرت علی المرتضی (رض) نے فرمایا : مجھے بتاؤ اگر ایک شخص عورت میں داخل کرتا ہو اور باہر بھی نکالتا ہو اس پر حد واجب ہوجاتی ہے ؟ سب نے کہا : جی ہاں ۔ فرمایا : کیا اس سے حد واجب ہوجاتی ہے اور غسل کے لیے ایک صاع پانی واجب نہیں ہوگا ۔ آپ (رض) نے مہاجرین کے حق میں فیصلہ کیا پھر حضرت عائشۃ صدیقہ (رض) کو اس کی خبر ہوئی انھوں نے فرمایا : بسا اوقات میں نے اور نبی کریم (صلی اللہ علیہ وآلہ وسلم) نے ایسا کیا ہے پھر ہم نے اٹھ کر غسل کرلیا ۔ (رواہ عبدالرزاق)