27546 ۔۔۔ عبدالرحمن بن ابزی روایت کی ہے کہ ایک دیہاتی سیدنا حضرت عمر بن خطاب (رض) کی خدمت میں حاضر ہوا اور عرض کیا : اے امیر المومنین ! ہم ایک ایک اور دو دو مہینوں تک پانی نہیں پاتے ہم کیا کریں ؟ سیدنا حضرت عمر بن خطاب (رض) نے فرمایا : رہی بات میری سو میں اس وقت تک نماز نہیں پڑھوں گا جب تک پانی نہ پالوں ۔ حضرت عمار بن یاسر (رض) نے کہا : کیا آپ کو یاد نہیں جب میں اور آپ فلاں جگہ اونٹ چروا رہے تھے آپ جانتے ہیں کہ مجھے جنابت لاحق ہوگئی تھی ؟ فرمایا : جی ہاں ؟ عمار (رض) نے کہا : میں مٹی میں لوٹ پوٹ ہوگیا تھا ۔ بعد میں نے نبی کریم (صلی اللہ علیہ وآلہ وسلم) سے اس کا تذکرہ کیا آپ ہنس پڑے اور فرمایا : تمہیں اتنی بات کافی تھی آپ نے زمین پر ہاتھ مارا پھر جھاڑ کر چہرے اور بازوؤں کا مسح کرلیا اور نصف بازوؤں تک مسح کیا ۔ سیدنا حضرت عمر بن خطاب (رض) نے فرمایا : اے عمار ! اللہ تعالیٰ سے ڈرو، عمار (رض) نے کہا : اے امیر المؤمنین یہ میرا حق بنتا تھا گر میں چاہتا آپ کو نہ بھی یاد کراتا اور حیاء کرجاتا ۔ سیدنا حضرت عمر بن خطاب (رض) نے فرمایا : بخدا ایسا ہرگز نہیں لیکن ان لوگوں کا انحصار تجھ پر ہے اور تو ہی اس کا ذمہ دار ہے۔ (رواہ عبدالرزاق)