27566 ۔۔۔ حضرت ابو ذر (رض) کی روایت ہے کہ میں مدینہ میں تھا وہاں کی ہوا میرے مزاج کے موافق نہ رہی (اور میں بیمار رہنے لگا) نبی کریم (صلی اللہ علیہ وآلہ وسلم) نے مجھے بکریاں دے کر کہیں کوچ کرنے کا حکم دیا مجھے جنابت لاحق ہوئی میں نے مٹی سے تیمم کرلیا اسی حالت میں میں نے کئی دنوں تک نماز پڑھی میرے دل میں کچھ تردد پڑگیا حتی کہ مجھے خیال ہوا کہ میں تو ہلاکت تک پہنچ گیا ہوں میں نے ایک اونٹ تیار کرنے کا حکم دیا اونٹ پر سامان سفر باندھ دیا گیا اور پھر میں سوار ہو کر مدینہ آگیا میں نے نبی کریم (صلی اللہ علیہ وآلہ وسلم) کو صحابہ صحابہ کرام رضوان اللہ تعالیٰ عنہم اجمعین کی ایک جماعت کے ساتھ مسجد کے سائے میں بیٹھے پایا میں نے آپ کو سلام کیا آپ نے سر مبارک اوپر اٹھایا اور فرمایا : سبحان اللہ ابو ذر ! میں نے عرض کیا : جی ہاں یا رسول اللہ (صلی اللہ علیہ وآلہ وسلم) میں جنبی ہوگیا تھا اور میں کئی دنوں تک تیمم کرتا رہا پھر مجھے کچھ شک ہوا حتی کہ مجھے خیال ہوا کہ میں تو ہلاک ہوگیا ۔ نبی کریم (صلی اللہ علیہ وآلہ وسلم) نے پانی منگوایا چنانچہ سیاہ فام باندی ایک بڑے سے برتن میں پانی لائی جو اوپر سے چھلک رہا تھا جو اس بات کی خبر دے رہا تھا کہ وہ بھر ہوا نہیں ہے۔ میں سواری کی اوٹ میں چلا گیا جبکہ آپ نے ایک شخص کو حکم دیا اس نے میرے آگے ستر کرلیا ، میں نے غسل کرلیا پھر آپ نے فرمایا : اے ابوذر ! پاک مٹی کافی ہوتی ہے جب تک تمہیں پانی نہ ملے اگرچہ دس سال تک کیوں نہ ملے۔ جب پانی پالو غسل کرلو (رواہ عبدالرزاق، و سعید بن المنصور)