27580 ۔۔۔ ” مسند اسلع بن شریک اعرجی “ اسلع بن شریک کہتے ہیں : میں نبی کریم (صلی اللہ علیہ وآلہ وسلم) کی اونٹنی کو سفر کے لیے تیار کرتا تھا چنانچہ ایک رات مجھے جنابت لاحق ہوگئی اور اس رات شدید سردی تھی نبی کریم (صلی اللہ علیہ وآلہ وسلم) نے کوچ کرنے کا ارادہ کیا میں نے حالت جنابت میں سواری تیار کرنا اچھا نہ سمجھا جب کہ ٹھنڈے پانی سے غسل کرنے سے مجھے مرجانے کا خوف دامن گیر ہوا یا کم از کم بیمار ہوجاؤں گا میں نے انصار میں سے ایک شخص کو حکم دیا اس نے آپ کی اونٹنی تیار کی پھر میں نے پتھروں سے آگ روشن کی اور پانی گرم کے کے غسل کیا اور پھر نبی کریم (صلی اللہ علیہ وآلہ وسلم) کے ساتھ جا ملا آپ نے مجھے دیکھ کر فرمایا اے اسلع ! کیا وجہ ہے میں تمہاری سواری متغیر دیکھتا ہوں ایک روایت میں ہے کہ تمہاری سواری مضطرب دیکھتا ہوں۔ میں نے عرض کیا : نبی کریم (صلی اللہ علیہ وآلہ وسلم) سواری میں نے نہیں تیار کی بلکہ ایک انصاری نے تیار کی ہے۔ آپ نے وجہ دریافت کی میں نے عرض کیا : نبی کریم (صلی اللہ علیہ وآلہ وسلم) مجھے جنابت لاحق ہوگئی تھی سردی کی وجہ سے مجھے اپنی جان کا خطرہ تھا تب میں نے اسے سواری تیار کرنے کا کہا اور میں نے آگ جلا کر پانی گرم کیا اور اس سے غسل کیا چنانچہ اللہ تبارک وتعالیٰ نے آیت کریمہ نازل فرمائی۔ ” یا ایھا الذین امنوا لا تقربوا الصلاۃ الی قولہ عفوا غفوارا “ (رواہ الحسن بن سفیان والبغوی والباوردی والطبرانی وابن مردویہ وابو نعیم والبیھقی والضیاء)