27582 ۔۔۔ ” مسند اسلع بن القع “ خطیب نے اپنی تاریخ میں لکھا ہے : ابو مسلم غالب بن علی بن محمد رازی (نیشار پور میں) حسین بن احمد بن محمد صفار (ہرات میں) عبدالملک بن محمد بن عبدالوھاب ابو محمد داؤد بن احمد ابو سلیمان بغدادی یہ دمیاط میں رہتے تھے ہمیں حدیث املا کرائی ابو عبدالرحمن معمر بن خالد شیبانی سروجی ربیع بن بدر عن ابیہ عن جدہ کے سلسہ سند سے حضرت اسقع (رض) کی روایت ہے کہ میں نبی کریم (صلی اللہ علیہ وآلہ وسلم) کی سواری لے کر چلتا تھا لیکن مجھے جنابت لاحق ہوگئی نبی کریم (صلی اللہ علیہ وآلہ وسلم) نے فرمایا : اے اسقع ہمارے لیے سواری تیار کرو میں نے عرض کیا : میرے ماں باپ آپ پر قربان جائیں میں جنابت میں مبتلا ہوگیا ہوں جب کہ پانی نہیں ہے آپ نے فرمایا : اے اسقع ! آؤ میں تمہیں تیمم کا طریقہ بتاتا ہوں جیسا کہ جبرائیل امین نے مجھے اس کا طریقہ بتایا ہے میں آپ کی خدمت میں حاضر ہوا آپ مجھے راستے کے کنارے پر لے گئے اور مجھے تیمم کا طریقہ سکھایا ۔ ابو عبدالرحمن کہتے ہیں مجھے ربیع نے تیمم کا طریقہ سکھایا۔ جس طرح انھیں ان کے باپ نے سکھایا اور انھیں جس طرح ان کے دادا نے سکھایا اور انھیں جس طرح اسقع (رض) نے سکھایا اور انھیں جس طرح نبی کریم (صلی اللہ علیہ وآلہ وسلم) نے سکھایا اور آپ کو جس طرح جبرائیل امین نے سکھایا عبدالملک کہتے ہیں : ہمیں ابو سلیمان نے تیمم کا طریقہ سکھایا حسین کہتے ہیں ہمیں عبدالملک نے سکھایا غالب کہتے ہیں ہمیں حسین بن احمد نے تیمم کا طریقہ سکھایا جس طرح انھیں عبدالملک نے سکھایا خطیب کہدتے ہیں ہمیں غالب نے تیمم کا طریقہ سکھایا جس طرح انھیں حسین نے سکھایا کہ انھوں نے دونوں ہاتھ زمین پر مارے پھر دونوں ہاتھوں سے چہرے کا مسح کیا پھر ہاتھ زمین پر مارے اور کہنیون تک ہاتھوں کا مسح کیا۔