27591 ۔۔۔ نافع و عبداللہ بن دینار کی روایت ہے کہ حضرت عبداللہ بن عمر (رض) کوفہ میں حضرت سعد ابی وقاص (رض) کے پاس آئے ابن عمر (رض) نے حضرت سعد (رض) کو موزوں پر مسح کرتے ہوئے دیکھا اور اس کا انکار کیا : حضرت سعد (رض) نے فرمایا : اپنے والد سے پوچھ لو جب ان کے پاس واپس جاؤ چنانچہ حضرت عبداللہ بن عمرو (رض) جب سیدنا حضرت عمر بن خطاب (رض) کے پاس گئے پوچھنا بھول گئے کچھ عرصہ بعد حضرت سعد (رض) تشریف لائے اور حضرت عبداللہ بن عمرو (رض) سے کہا : کیا تم نے اپنے والد سے پوچھا ہے : جواب دیا نہیں دیا ۔ پھر حضرت عبداللہ بن عمرو (رض) نے سیدنا حضرت عمر بن خطاب (رض) سے پوچھا : آپ نے فرمایا : جب تم پاؤں موزوں میں داخل کرو بشرطیکہ پاؤں پاک ہوں تو موزوں پر مسح کرلو ۔ عبداللہ (رض) نے کہا : اگر کوئی پاخانے سے فارغ ہو کر آئے وہ بھی مسح کرے ؟ سیدنا حضرت عمر بن خطاب (رض) نے فرمایا : اگرچہ کوئی پاخانے سے فارغ ہو کر آئے وہ بھی مسح کرے (رواہ مالک واحمد بن حنبل)