27696 ۔۔۔ ” مسند ابن عوف “ زہری، ابو سلمہ عن ابیہ کی سند سے مروی ہے کہ نبی کریم (صلی اللہ علیہ وآلہ وسلم) نے موزوں پر مسح کیا ۔ (رواہ ابن عساکر) ” فائدہ : ۔۔۔ امام اعظم ابوحنیفہ (رح) نے اہل سنت والجماعت کی پہچان بتائی ہے ” انہ یفضل الشخین ویحب الختین ویری مسح الخفین “۔ یعنی وہ شیخین ابوبکر وعمر (رض) کو دوسرے صحابہ کرام رضوان اللہ تعالیٰ عنہم اجمعین پر فضیلت دیتا ہوں، دو دامادوں یعنی عثمان وعلی (رض) سے محبت کرتا ہو اور موزوں پر مسح کرنا جائز سمجھتا ہو، بیشمار صحابہ کرام رضوان اللہ تعالیٰ عنہم اجمعین سے مسح کا ثبوت ملتا ہے ، چنانچہ حضرت جریر (رض) جو کہ سورت مائدہ کی آیت وضو کے نزول کے بعد اسلام لائے ہیں وہ بھی نبی کریم (صلی اللہ علیہ وآلہ وسلم) کو دیکھ کر مسح علی الخفین کرتے تھے لہٰذا روافض کا یہ کہنا کہ مسح علی الخفین آیت وضو سے منسوخ ہے محض باطل ہے ، مسح علی الخفین پر اجماع ہے حتی کہ ابو الحسن کرخی (رح) کہتے ہیں جو شخص مسح علی الخفین کو روا نہ سمجھے مجھے اس کے کافر ہوجانے کا خوف ہے حضرت حسن (رح) فرماتے ہیں مجھے ستر (70) صحابہ کرام رضوان اللہ تعالیٰ عنہم اجمعین نے حدیثیں سنائی ہیں کہ نبی کریم (صلی اللہ علیہ وآلہ وسلم) نے مسح علی الخفین کیا ہے علامہ عینی فرماتے ہیں اسی (80) سے زائد صحابہ کرام رضوان اللہ تعالیٰ عنہم اجمعین مسح علی الخفین کے راوی ہیں اسی لیے امام ابوحنیفہ (رح) نے فرمایا : میں اس وقت مسح علی الخفین کا قائل ہوا جب اس کا جواز روز روشن کی طرح میرے لیے واضح ہوگیا ۔