27935 ۔۔۔ ” ایضاء “ زاذان کی روایت ہے کہ ایک مرتبہ ہم سیدنا حضرت علی المرتضی (رض) کے پاس تھے آپ (رض) نے خیار کا تذکرہ کیا اور فرمایا : امیر المؤمنین نے مجھ سے خیار کے متعلق پوچھا : میں نے کہا نبی کریم (صلی اللہ علیہ وآلہ وسلم) اگر عورت اپنے نفس کو اختیار کرے تو ایک طلاق بائن ہوگی اگر اپنے خاوند کو اختیار کرے تو ایک طلاق ہوگی اور اسے رجوع کا حق حاصل ہوگا سیدنا حضرت عمر بن خطاب (رض) نے فرمایا : یوں نہیں ہے۔ لیکن اگر عورت اپنے خاوند کو اختیار کرتی ہے تو کوئی طلاق نہیں ہوگی اگر اپنے نفس کو اختیار کرتی ہے تو ایک طلاق ہوگی اور خاوند کو رجوع کا حق حاصل ہوگا ، میں صرف امیر المؤمنین سیدنا حضرت عمر بن خطاب (رض) کی اتباع کی طاقت رکھتا ہوں جب معاملہ میرے سپرد ہوگا اور مجھے معلوم ہوگا کہ میں عورتوں کا مسؤل ہوں تو اس وقت میں وہی اختیار کروں گا جو بہتر سمجھوں گا ، لوگوں نے کہا : بخدا اگر آپ امیر المؤمنین سیدنا حضرت عمر بن خطاب (رض) کے قول پر پختہ رہتے ہیں اور اپنے قول کو چھوڑ دیتے ہیں تو یہ تفرد سے ہمیں زیادہ محبوب ہوگا سیدنا حضرت علی المرتضی (رض) نے ہنس کر فرمایا : سیدنا حضرت عمر بن خطاب (رض) نے زید بن ثابت (رض) کو پیغام بھیج کر یہی مسئلہ دریافت کیا تو زید (رض) نے میری مخالفت کی ہے اور سیدنا حضرت عمر بن خطاب (رض) کی مخالفت کی ہے وہ تو کہتے ہیں : اگر عورت اپنے نفس کو اختیار کرے گی تو اسے تین طلاقیں ہوں گی اور اگر اپنے خاوند کو اختیار کرے گی تو اسے ایک طلاق ہوگی اور خاوند کو رجوع کا حق حاصل ہوگا ۔ (رواہ البیہقی)