27995 ۔۔۔ ابن جریج کہتے ہیں مجھے عبدالکریم بن ابی مخارق نے خبر دی ہے کہ ایک عورت سیدنا حضرت عمر بن خطاب (رض) کے پاس آئی اور کہنے لگی : میں نے اپنے شوہر کی وفات کے بعد عدت گزرنے سے قبل حمل وضع کردیا ہے۔ سیدنا حضرت عمر بن خطاب (رض) نے فرمایا : تجھے عدت میں وہ مدت گزارنی ہوگی جو بعد والی ہوگی چنانچہ وہ عورت حضرت ابی بن کعب (رض) کے پاس سے گزری حضرت ابی (رض) نے عورت سے کہا : تم کہاں سے آرہی ہو عورت نے واقعہ بیان کیا اور عمر (رض) کا قول بھی بتلایا ، ابی (رض) نے کہا : سیدنا حضرت عمر بن خطاب (رض) کے پاس واپس جاؤ اور کہو ابی بن کعب (رض) کہتا ہے کہ تیری عدت گزر چکی ہے۔ اگر سیدنا حضرت عمر بن خطاب (رض) نے مجھے تلاش کیا تو میں یہاں ہی بیٹھا ہوں ، چنانچہ عورت سیدنا حضرت عمر بن خطاب (رض) کے پاس گئی اور انھیں خبردی ، عمر (رض) نے کہا : ابی (رض) کو میرے پاس بلا لاؤ عورت آئی اور ابی (رض) کو اپنے ساتھ لے کر واپس ہوئی ، سیدنا حضرت عمر بن خطاب (رض) نے ابی (رض) سے فرمایا، یہ عورت کیا کہتی ہے ، ابی (رض) نے کہا : میں نے نبی کریم (صلی اللہ علیہ وآلہ وسلم) سے عرض کیا تھا اللہ تبارک وتعالیٰ کا فرمان سنتا ہوں ۔ ” واولات الاحمال اجلھن ان یضعن حملھن “۔ آیا کہ وہ عورت جس کا خاوند وفات پا جائے اور وہ حاملہ بھی ہو وہ حمل وضع کر دے اس کی عدت بھی یہی ہے نبی کریم (صلی اللہ علیہ وآلہ وسلم) نے فرمایا : جی ہاں ۔ سیدنا حضرت عمر بن خطاب (رض) نے عورت سے فرمایا : جو تم سن رہی ہو میں بھی سن رہا ہو ۔ (رواہ عبدالرزاق)