28465 ۔۔۔ (مسند اسامہ بن شریک ) اسامہ بن شریک کہتے ہیں کہ میں نبی کریم (صلی اللہ علیہ وآلہ وسلم) کے پاس حاضر ہوا ۔ آپ کے صحابہ کرام (رض) آپ کے پاس موجود تھے گویا کہ ان کے سروں پر پرندے بیٹھے تھے (یعنی بالکل مؤدبانہ سکوت کی حالت میں تھے ) کہتے ہیں کہ میں نے سلام کیا اور آپ کے پاس بیٹھ گیا پس دیہات کے لوگ آگئے اور انھوں نے آپ سے سوال کیا : کہنے لگے اے اللہ کے رسول : کیا ہم داودارو کریں ؟ ارشاد فرمایا ہاں اس لیے کہ اللہ تبارک وتعالیٰ نے کوئی بیماری نہیں اتاری مگر اس کی داو بھی اتاری سوائے ایک بیماری کے یعنی بڑھاپا ۔ راوی کہتے ہیں کہ پس جب اسامہ بن شریک عمر رسیدہ ہوئے تو کہتے تھے کہ کیا تم اب میرے لیے کوئی دوا پاتے ہو ؟ کہتے ہیں کہ انھوں نے آپ (صلی اللہ علیہ وآلہ وسلم) سے کچھ اشیاء کے بارے میں سوال کیا کہ کیا ہم پر فلاں فلاں چیز میں کوئی حرج ہے ؟ ارشاد فرمایا اللہ کے بندو ! اللہ نے حرج کو معاف کردیا مگر ایک آدمی سے کہ جس نے کسی مسلمان کی ظلما حق تلفی کی پس یہ وہ آدمی ہے جو گناہ گار ہوا اور ہلاکت میں گرفتار ہوا ۔ عرض کیا وہ سب سے بہتر چیز جو لوگوں کو عطا کی گئی کیا ہے ؟ ارشاد فرمایا خوش اخلاقی ۔ (ابو داؤد طیاسی ، مسند احمد ، حمیدی ، ابو داؤد ترمذی ، ترمذی (رح) کہتے ہیں کہ حدیث حسن صحیح ہے۔ (نسائی ابن ماجہ ، ابو نعیم فی المعرفہ)