28500 ۔۔۔ محمود بن لبید (رض) سے مروی ہے کہ یحییٰ بن الحکم نے مجھے جرش (اردن کا ایک علاقہ) پر امیر بنایا میں وہاں پہنچا تو لوگوں نے مجھے بیان کیا کہ عبداللہ بن جعفر (رض) نے ہمیں یہ حدیث سنائی تھی کہ رسول اللہ (صلی اللہ علیہ وآلہ وسلم) نے اس بیماری (جذام) والے کے لیے ارشاد فرمایا کہ اس سے ایسے پرہیز کرو جیسے درندہ سے پرہیز کیا جاتا ہے جب وہ کسی وادی میں اترے تو تم اس کے علاوہ کسی اور وادی میں اترو۔ میں نے انھیں کہا اللہ کی قسم اگر ابن جعفر (رض) نے تمہیں یہ حدیث سنائی ہے تو انھوں نے جھوٹ نہیں کہا۔ پس جب امیر نے مجھے جرش کی امارت سے علیحدہ کردیا تو میں مدینہ آیا اور عبداللہ بن جعفر (رض) سے ملا میں نے کہا کہ اے ابو جعفر وہ کیا حدیث ہے جو آپ کی روایت ہے مجھے اھل جرش نے بیان کی ہے (پھر اس حدیث کا مضمون بیان کیا) وہ بولے اللہ کی قسم انھوں نے جھوٹ کہا میں نے ان کو یہ حدیث نہیں بیان کی اور میں نے تو سیدنا حضرت عمر بن خطاب (رض) کو دیکھا کہ ان کے پاس برتن لایا جاتا اور اس میں پانی ہوتا پس وہ معیقیب (رض) کو دیتے اور وہ ایسے شخص تھے کہ ان میں یہ بیماری پھیل گئی تھی (جذام) پس وہ اس میں سے پیتے پھر سیدنا حضرت عمر بن خطاب (رض) اس کو ان کے ہاتھ سے لیتے اور اپنا منہ ان کے منہ کی جگہ رکھتے حتی کہ اس میں سے پیتے پس میں جان گیا کہ سیدنا حضرت عمر بن خطاب (رض) یہ عمل اس بات سے بچنے کے لیے کرتے ہیں کہ عدوی (تعدیہ مرض بسبب مجاورت و اختلاط کا عقیدہ) کا کوئی حصہ ان کے طبیعت میں (نہ) داخل ہوجائے ۔ اور سیدنا حضرت عمر بن خطاب (رض) ان کے لیے ہر اس شخص سے علاج کا مطالبہ کرتے جس کے متعلق مشغلہ علاج کا سنتے ۔ حتی کہ ان کے پاس یمن سے دو آدمی آئے پس آپ نے ان سے پوچھا کہ کیا تمہارے پاس اس مرد صالح کے لیے کوئی علاج ہے اس لیے کہ یہ بیماری ان کے بدن میں تیزی سے بڑھ رہی ہے۔ ان دونوں نے کہا کہ ایسی چیز جو اس کو ختم کر دے اس پر تو ہم قادر نہیں ہیں البتہ ہم ایسی دوا ضرور کرسکتے ہیں جو اس کو روک دے اور بڑھنے نہ دے سیدنا حضرت عمر بن خطاب (رض) نے فرمایا کہ اس کا رک جانا بھی بڑی عافیت ہے پس بڑھے نہیں وہ کہنے لگے کہ کیا تمہاری زمین میں حنظل اگتے ہیں ؟ آپ نے فرمایا کہ ہاں انھوں نے کہا تو پھر جمع کروا دیجئے سیدنا حضرت عمر بن خطاب (رض) نے حکم دیدیا ۔ اور حنظل کے دو بڑے ٹوکرے آپ کے پاس جمع کردیئے گئے ، یہ دونوں صاحب حنظل کے دانوں میں مشغول ہوئے اور سب کو دو دوٹکڑے کردیا پھر معقیب (رض) کو لٹا دیا اور آپ کے پیروں کے تلووں پر حنظل رگڑنے شروع کیے حتی کہ جب ایک ختم ہوجاتا تو وہ دوسرا لیتے (یہ عمل انھوں نے کرلیا) حتی کہ ہم نے ملاحظہ کیا کہ معیقب (رض) کے ناک کی رطوبت سبز سیاہی مائل رنگ کی نکلنے لگی ، پھر انھوں نے ان کو چھوڑ دیا اور کہا کہ اب یہ بیماری کبھی نہیں بڑھے گی ، پس اللہ کی قسم معیقیب (رض) کا بدن ٹھہر گیا (یعنی جذام کی وجہ سے جھڑنا ختم ہوگیا اور تکلیف آگے نہ بڑھی حتی کہ ان کی موت آگئی (روایت کیا ابن سعد نے اور ان ابن جریر نے اس کا شروع کا حصہ ” عدوی سے بچنے کے لیے تک نقل کیا ۔