2895: سورة الانعام۔ اللہ پاک یہود پہ لعنت فرمائے۔ اللہ تعالیٰ نے جب ان پر چربیوں کو حرام قرار دیا تو انھوں نے اس کو پگھلا کر فروخت کیا اور اس کے پیسے سے کھانے لگے۔
مسند، بخاری، مسلم، ابن ماجہ، ترمذی، ابو داود، نسائی بروایت جابر (رض)، بخاری، مسلم بروایت ابوہریرہ، (رض) ، مسند احمد، بخاری مسلم، نسائی ابن ماجہ، عمر (رض)۔
تشریح : ومن البقر والغنم حرمنا علیہم شحومہما الا ما حملت ظہورہما او الحوایا او مااختلط بعظم۔ اور گائے اور بکری میں سے حرام کی تھی ان کی چربی مگر جو لگی ہو پشت پر یا آنتوں پر یا جو چربی ملی ہو ہڈی کے ساتھ۔
اللہ عزوجل نے یہود بنی اسرائیل پر بطور سزا مذکورہ جگہوں کے علاوہ گائے اور بکری کی چربی حرام قرار دی تھی۔ مگر انھوں نے اس کو پگھلا کر تیل بنایا اور اس کو فروخت کرکے اس کی قیمت کھانے پینے لگے۔ جیسے کہ آجکل بعض لوگ اللہ کی حرام کردہ اشیاء کو مختلف حیلے بہانوں سے استعمال کرتے ہیں۔ ان پر آپ (صلی اللہ علیہ وآلہ وسلم) نے مذکورہ حدیث میں لعنت فرمائی ہے۔
مسلمانوں کے لیے مذکورہ چربی بالکل حلال ہے جو کہ یہود کے لیے حرام کی گئی تھی۔