29556 ۔۔۔ ابن سیرین کی روایت ہے کہ سرزمین یمن سے ایک مسلمان سیدنا حضرت عمر بن خطاب (رض) کے پاس آیا اور اس نے کہا میں نے یمن میں ایک چیز دیکھی ہے کہ وہ لوگ تاریخ کا استعمال کرتے ہیں اور اپنے خطوط میں لکھتے ہیں کہ فلاں سال اور فلاں مہینے سے سیدنا حضرت عمر بن خطاب (رض) نے فرمایا : یہ تو بڑی اچھی بات ہے تم لوگ بھی تاریخ کا اجراء کرو جب تاریخ مقرر کرنے پر صحابہ کرام رضوان اللہ تعالیٰ عنہم اجمعین کا اجماع ہوا تو سیدنا حضرت عمر بن خطاب (رض) نے صحابہ کرام رضوان اللہ تعالیٰ عنہم اجمعین سے مشورہ لیا بعض لوگوں نے کہا ہمیں نبی کریم (صلی اللہ علیہ وآلہ وسلم) کی ولادت کو بنیاد بنانا چاہیے ، بعض لوگوں نے بعثت کی رائے دی جبکہ بعض نے ہجرت مدینہ کا قول کیا بعض وفات کو بنیاد بنانے کا مشورہ دیا جبکہ بعض نے کہا : مکہ سے مدینہ کی طرف خروج کو بنیاد بنایا جائے پھر ہم اس سال کو پہلا سال سمجھیں پھر یہ بات طے ہونا باقی رہی کہ کس مہینہ سے سال کی ابتداء کی جائے (یعنی سال کا پہلا مہینہ کونسا ہو) بعض لوگوں نے کہا رجب پہلا مہینہ ہونا چاہیے چونکہ اہل جاہلیت رجب کی تعظیم کرتے ہیں ، بعض لوگوں نے کہا رمضان پہلا مہینہ ہونا چاہیے بعض نے ذوالحجہ کا کہا بعض نے اسی مہینے کا قول کیا جس مہینہ میں آپ (صلی اللہ علیہ وآلہ وسلم) نے ہجرت کی تھی بعض نے کہا وہ مہینہ پہلا ہو جس میں آپ مدینہ تشریف لائے بالآخر سیدنا حضرت عثمان ذوالنورین (رض) نے فرمایا : محرم کو سال کا پہلا مہینہ قرار دو چونکہ یہ حرمت والا مہینہ ہے۔ اور یہ گنتی میں بھی پہلا مہینہ ہوتا ہے اور حج سے واپسی کا یہی مہینہ ہے یوں مسلمانوں نے سال کا پہلا مہینہ محرم قرار دیا یہ واقعہ 17 ھ ماہ ربیع الاول میں پیش آیا ۔ (رواہ ابن ابی خیثمۃ فی تاریخہ)