29993 ۔۔۔ واقدی محمد بن عبداللہ زہری عروہ ومحمد صالح بن عمرو بن رومان کے سلسلہ سے مروی ہے کہ بدر کے دن عتبہ مدمقابل کے لیے للکارا جبکہ نبی کریم (صلی اللہ علیہ وآلہ وسلم) جھونپڑی میں تھے اور صحابہ کرام رضوان اللہ تعالیٰ عنہم اجمعین صف بستہ تھے نبی کریم (صلی اللہ علیہ وآلہ وسلم) پر نیند کا غلبہ ہوا آپ (صلی اللہ علیہ وآلہ وسلم) تھوڑی دیر کے لیے لیٹ گئے (نیند کا غلبہ کیا تھا بلکہ عین حالت جنگ میں رحمت خداوندی نے ڈھانپ لیا تھا اس کی وجہ سے ڈھانپ لیا تھا جیسا کہ فرمان باری تعالیٰ ہے ” اذ یغشیکم النعاس امنۃ “۔ (الایۃ) اور فرمایا اس وقت تک جنگ شروع نہیں کرنی جب تک میں تمہیں اجازت نہ دوں اگر دشمن حرکت میں آجائے ان پر تیر برساؤ اور تلواریں نہ سونتو حتی کہ دشمن تمہیں ڈھانپ نہ لے تھوڑی دیر بعد ابوبکر (رض) نے عرض کیا : یا رسول اللہ (صلی اللہ علیہ وآلہ وسلم) دشمن قریب آچکا ہے اور ہمیں گھیرے میں لے رہا ہے نبی کریم (صلی اللہ علیہ وآلہ وسلم) بیدار ہوئے اللہ تعالیٰ نے آپ کو خواب میں کفار کی تعداد کم کرکے دکھائی اور یوں مسلمانوں کی نظر میں بھی کفار کم دکھائی دینے لگے ۔ رسول اللہ (صلی اللہ علیہ وآلہ وسلم) گھبرا کر بیدار ہوئے اور دونوں ہاتھ اوپر اٹھا کر رب تعالیٰ سے دعائیں مانگنی شروع کیں اور کہا : یا اللہ ! اگر تو نے کفار کو اس جماعت پر غالب کردیا شرک غالب ہوجائے گا ابوبکر (رض) نے کہا : یا رسول اللہ (صلی اللہ علیہ وآلہ وسلم) ! اللہ تعالیٰ آپ کی ضرور مدد کرے گا اور آپ کو خوش وخرم کرے گا ، ابن رواحہ (رض) نے کہا : یارسول اللہ (صلی اللہ علیہ وآلہ وسلم) میں آپ کو مشورہ دیتا ہوں جبکہ رسول اللہ (صلی اللہ علیہ وآلہ وسلم) مشورہ دیئے جانے سے بالاتر ہیں اور اللہ تعالیٰ بھی مشورہ دیئے جانے سے بالاتر ہے آپ نے فرمایا اے ابن رواحہ : کیا اللہ تعالیٰ کو اس کے وعدے کا واسطہ نہ دیا جائے اللہ تعالیٰ وعدہ خلافی نہیں کرتا اتنے میں عتبہ جنگ کے لیے سامنے آیا خفاف بن ایماء (رض) کہتے ہیں میں نے نبی کریم (صلی اللہ علیہ وآلہ وسلم) کے صحابہ کرام رضوان اللہ تعالیٰ عنہم اجمعین کو بدر کے دن دیکھا جبکہ لوگوں نے صفیں باندھ رکھی تھیں اور ابھی تلواریں نہیں سونتی تھیں اور تیر کمانوں میں ڈال رکھے تھے جبکہ بعض لوگ دوسروں کی صفوف کو اپنے آگے ڈھال بنائے ہوئے تھے ، صفوں میں خلا نہیں تھا جبکہ بعض لوگوں نے تلواریں سونت لی تھیں میں نے بعد میں مہاجرین میں سے ایک شخص سے اس بارے میں سوال کیا ۔ اس نے کہا : ہمیں نبی کریم (صلی اللہ علیہ وآلہ وسلم) نے حکم دیا کہ اس وقت تک ہم تلواریں نہ سونتیں جب تک دشمن ہمیں گھیر نہ لے لوگ ایک دوسرے کے قریب ہوئے اتنے میں عتبہ ، شیبہ اور ولید صف سے نکل کر باہر آئے پھر مبارزت کا نعرہ لگایا چنانچہ ان کی مبارزت پر انصار کے تین نوجوان معاذ، معوذ ، اور عوف بن حارث نکلے نبی کریم (صلی اللہ علیہ وآلہ وسلم) کو اس سے شرم آئی کہ جنگ کے شروعات میں مشرکین کے مدمقابل انصار ہوں لہٰذا آپ نے چاہا کہ یہ کانٹا آپ کی قوم کے افراد کے لیے مختص ہو آپ نے انصار کو واپس کردیا اور ان کی حوصلہ افزائی میں اچھی بات کہی پھر مشرکین کی صدا سنائی دی ۔ وہ یہ کہ اے محمد ہماری قوم سے ہمارے ہمسروں کو نکالو نبی کریم (صلی اللہ علیہ وآلہ وسلم) نے فرمایا : اے بنی ہاشم کھڑے ہوجاؤ اور اس حق کے لیے لڑو جس کے ساتھ اللہ نے تمہارے نبی کو مبعوث کیا ہے جبکہ یہ مشرکین اللہ کے نور کو بجھانے آئے ہیں اتنے میں حضرت حمزہ بن عبدالمطلب علی بن ابی طالب اور عبیدہ بن حارث بن عبدالمطلب بن عبد مناف (رض) کھڑے ہوئے چلتے چلتے مشرکین کے پاس آئے عتبہ نے کہا بات کرو تاکہ ہم تمہیں پہچان لیں چونکہ جنگی ٹوپیاں ہونے کی وجہ سے مشرکین انھیں پہچان نہ سکے ۔ کہا : اگر تم ہمارے ہمسر ہوئے ہم تمہارے ساتھ لڑیں گے حضرت حمزہ (رض) نے کہا : میں حمزہ بن عبدالمطلب اللہ کا شیر اور اللہ کے رسول کا شیر ہوں عتبہ نے کہا : کیا خوب مدمقابل ہے پھر عتبہ نے کہا : میں حلیفوں کا شیر ہوں تمہارے ساتھ یہ دو کون ہیں حمزہ (رض) نے جواب دیا : یہ علی بن ابی طالب اور عبیدہ بن حارث ہیں عتبہ نے کہا : یہ بھی اچھے ہمسر ہیں پھر عتبہ نے اپنے بیٹے سے کہا : اے ولید کھڑے ہوجاؤ ولید کھڑا ہو اس کی طرف حضرت علی (رض) بڑھے حضرت علی (رض) اپنے دونوں ساتھیوں سے عمر میں چھوٹے تھے ، چنانچہ دونوں میں دو دو ہاتھ ہوئے تاہم حضرت علی (رض) نے ولید کو واصل جہنم کیا پھر عتبہ کھڑا ہوا حضرت حمزہ (رض) اس کی طرف بڑھے ان میں بھی دو دو ہاتھ ہوئے لیکن حمزہ (رض) نے عتبہ کو قتل کردیا پھر شیبہ کھڑا ہوا اس کی طرف عبیدہ (رض) بڑھے ، عبیدہ (رض) صحابہ کرام رضوان اللہ تعالیٰ عنہم اجمعین میں معمر شخص تھے تاہم شیبہ نے آپ (رض) کی ٹانگ تلوار سے زخمی کردی جس سے پنڈلی کا گوشت کٹ گیا یہ حالت دیکھ کر حضرت حمزہ (رض) اور سیدنا حضرت علی المرتضی (رض) نے پلٹ کر شیبہ پر حملہ کردیا اور اسے واصل جہنم کیا اور دونوں عبیدہ (رض) کو اٹھائے اپنے ساتھیوں میں آملے ، جبکہ عبیدہ (رض) کی ٹانگ سے گودا بہہ رہا تھا عرض کیا : یا رسول اللہ (صلی اللہ علیہ وآلہ وسلم) کیا میں شہید نہیں ہوں آپ نے فرمایا : جی ہاں تم شہید ہو پھر کہا : کاش ابو طالب زندہ ہوتے جان لیتے کہ ان کے شعر کا میں خوب مصداق ہوں : کذبتم وبیت اللہ یبز محمد ولما نطا عن دونہ ونتاضل ونسلمہ حتی نصرع دونہ ونذھل عن ابناء نا والحلائل : بیت اللہ کی قسم ! تم جھوٹ بولتے ہو محمد (صلی اللہ علیہ وآلہ وسلم) مغلوب نہیں ہوں گے چونکہ ہم اس کے آگے پیچھے نیزوں اور تیروں سے اس کا دفاع کریں گے ہم انھیں صحیح و سلامت رکھیں گے اور اس کے آگے پیچھے ڈھیر ہوجائیں گے اور اس کی خاطر ہم اپنے بیٹوں اور بیویوں کو بھول جائیں گے ۔ پھر یہ آیت نازل ہوئی ’(آیت)” ھذان خصمان اختصموا فی ربھم “۔ یہ دو جھگڑنے والے اپنے رب کے متعلق جھگڑ رہے ہیں حضرت حمزہ (رض) نبی کریم (صلی اللہ علیہ وآلہ وسلم) سے چار سار عمر میں بڑے تھے جبکہ حضرت عباس (رض) آپ سے تین سال بڑے تھے مؤرخین کا کہنا ہے کہ جب عتبہ نے مبارزت کا نعرہ لگایا تو حضرت ابو حذیفہ (رض) اٹھ کر اس کی طرف بڑھے نبی کریم (صلی اللہ علیہ وآلہ وسلم) نے فرمایا : بیٹھ جاؤ چنانچہ جب صحابہ کرام رضوان اللہ تعالیٰ عنہم اجمعین کی جماعت اٹھ کر آگے بڑھی تو ابو حذیفہ (رض) نے لپک کر اپنے باپ عتبہ پر حملہ کیا اور اسے قتل کردیا ۔ (رواہ ابن عساکر)