30093 ۔۔۔ مصعب کی روایت ہے کہ ابن زبیر (رض) حدیث سنایا کرتے تھے کہ غزوہ خندق کے دن وہ قلعہ میں ایک بلند جگہ پر تھے جبکہ حضرت حسان بن ثابت (رض) عورتوں کے ساتھ تھے اور ان کے ساتھ عمر بن ابی سلمہ (رض) بھی تھے ابن زبیر (رض) کا کہنا ہے کہ حسان بن ثابت (رض) نے ایک اونچی جگہ پر کھونٹا گاڑ رکھا تھا جب صحابہ کرام رضوان اللہ تعالیٰ عنہم اجمعین مشرکین پر حملہ کرتے حسان (رض) کھونٹے پر تلوار سے حملہ کردیتے اور جب مشرکین ہجوم بنا کر آئے تب بھی کھونٹے پر حملہ کرتے تاکہ یوں لگے گویا حسان (رض) کسی بہادر دشمن سے لڑ رہے ہیں اور ایک طرح کی مشابہت بھی ہوجائے دیکھنے سے یوں لگے گویا جہاد میں مصروف ہیں وہ ایسا ضعف کی وجہ سے کرتے تھے (حضرت حسان (رض) اگرچہ دست وبازو سے جہاد کرنے سے ضعیف تھے لیکن جو جہاد انھوں نے زبان سے مشرکین کے خلاف اشعار کہہ کر کیا ہے اس کی مثال نہیں ملی) عبداللہ بن زبیر (رض) کہتے ہیں اس دن میں نے ابن ابی سلمہ پر بڑا ظلم کیا وہ مجھ سے دو سال بڑا تھا میں اسے کہتا پہلے تم مجھے اپنی گردن پر اٹھاؤ تاکہ میں تماشا دیکھوں (چونکہ ابن زیبر 3، 4، سال کے بچے تھے) پھر میں تمہیں اٹھاؤں گا جب اس کے اٹھانے کی باری آتی میں کہتا اس بار نہیں اگلی بار ابھی میں اپنے باپ کو دیکھ رہا ہوں میری باپ نے زور رنگ کا عمامہ باندھ رکھا ہے ، بعد میں میں نے اپنے والد سے اس کا تذکرہ کیا انھوں نے مجھ سے پوچھا : تم اس وقت کہاں تھے ؟ میں نے کہا : میں ابن ابی سلمہ کی گردن پر تھا اس نے مجھے اٹھا رکھا تھا میرے والد (رض) نے فرمایا قسم اس ذات کی جس کے قبضہ قدرت میں میری جان ہے اس وقت نبی کریم (صلی اللہ علیہ وآلہ وسلم) نے میرے لیے اپنے والدین جمع کیے (یعنی فرمایا تم پر میرے ماں باپ فدا ہوں) ابن زبیر (رض) کہتے ہیں اسی اثناء میں ایک یہودی قلعہ کی طرف آنکلا اور قلعے پر چڑھنے لگا حضرت صفیہ (رض) نے حضرت حسان (رض) سے کہا : اے حسان (رض) اس یہودی کی خبر لو حسان (رض) نے کہا : اگر میں جنگ لڑسکتا تو نبی کریم (صلی اللہ علیہ وآلہ وسلم) کے ساتھ ہوتا صفیہ (رض) نے حسان (رض) سے کہا : اچھا اپنی تلوار مجھے دو حسان (رض) نے انھیں تلوار دے دی جب یہودی اوپر چڑھ آیا صفیہ (رض) نے اس پر حملہ کردیا اور یہودی کو قتل کرکے اس کا سر تن سے جدا کردیا پھر حسان (رض) کو سر دے کر کہا کہ یہ سر نیچے پھینکو چونکہ مرد عورت کی بنسبت دور تک پھینک سکتا ہے صفیہ (رض) چاہتی تھیں تاکہ یہودی کے دوسرے ساتھیوں پر رعب پڑے کہ قلعہ میں بھی کچھ مسلمان سپاہی موجود ہیں۔ (رواہ الزبیر بن بکار وابن عساکر)