30106 ۔۔۔ حضرت عبداللہ بن عباس (رض) کی روایت ہے کہ میں نے حضرت عمر (رض) کو فرماتے سنا کہ عمرو بن عبدو غزوہ خندق کے موقع پر آیا اور اپنا گھوڑا لیے چکر لگاتا رہا بالآخر ایک جگہ سے خندق عبور کر آیا اور کہنے لگا میرے مقابلہ میں کون آئے گا نبی کریم (صلی اللہ علیہ وآلہ وسلم) کے صحابہ کرام رضوان اللہ تعالیٰ عنہم اجمعین خاموش رہے پھر نبی کریم (صلی اللہ علیہ وآلہ وسلم) نے فرمایا : کیا کوئی شخص اس کے مد مقابل ہوگا ؟ سیدنا حضرت علی المرتضی (رض) کھڑے ہوئے اور عرض کیا : یا رسول اللہ (صلی اللہ علیہ وآلہ وسلم) میں اس کا مدمقابل ہونا چاہتا ہوں ، نبی کریم (صلی اللہ علیہ وآلہ وسلم) نے پھر فرمایا کیا کوئی شخص اس کا مد مقابل ہوگا ؟ سیدنا حضرت علی المرتضی (رض) نے عرض کیا : نبی کریم (صلی اللہ علیہ وآلہ وسلم) مجھے چھوڑیئے میں اس کا مقابلہ کرتا ہوں چونکہ مجھے دو طرح کی نیکیوں میں اختیار حاصل ہے اگر میں نے اسے قتل کیا تو وہ دوزخ میں چلا جائے گا اور اگر اس نے مجھے قتل کیا میں جنت میں داخل ہوں گا نبی کریم (صلی اللہ علیہ وآلہ وسلم) نے اجازت دے دی اور فرمایا : اے علی جاؤ چنانچہ سیدنا حضرت علی المرتضی (رض) کے مقابلہ کے لیے اٹھ کھڑے ہوئے جب اس کے قریب ہوئے نے پوچھا اے بھتیجے تم کون ہو ؟ سیدنا حضرت علی المرتضی (رض) نے جواب دیا : میں علی ہوں عمرو نے کہا : تیرا باپ میرا شراب کا ساتھی ہے میں تجھے قتل کرنا اچھا نہیں سمجھتا سیدنا حضرت علی المرتضی (رض) نے کہا : تو نے قسم اٹھا رکھی ہے کہ تجھ سے جو شخص بھی تین چیزوں کا مطالبہ کرے گا تو اسے ضرور پورا کرے گا سو میں تجھ سے صرف ایک چیز کا مطالبہ کرتا ہوں عمرو نے استفسار کیا کہ وہ کیا چیز ہے ؟ سیدنا حضرت علی المرتضی (رض) نے کہا : میں تجھے دعوت دیتا ہوں کہ تو کلمہ شہادت ” لا الہ الا اللہ وان محمد رسول اللہ “ کی گواہی دے دے عمرو نے کہا : مجھے تیری رسوائی کا اختیار نہیں چاہیے سیدنا حضرت علی المرتضی (رض) نے کہا : اچھا پھر واپس چلے جاؤ نہ ہمارے خلاف رہو اور نہ ہمارے ساتھ عمرو نے کہا : میں نے منت مان رکھی ہی کہ میں حمزہ کو قتل کروں گا لیکن وحشی مجھ پر سبقت لے گیا میں نے پھر منت مانی ہے کہ میں محمد کو قتل کروں گا سیدنا حضرت علی المرتضی (رض) کہا اچھا پھر نیچے اترو عمرو گھوڑے سے نیچے اترا پھر دونوں کی تلواریں کوندنے لگیں تاہم سیدنا حضرت علی المرتضی (رض) نے اس کا کام تمام کردیا (رواہ المحاملی فی امالیہ)