30116 ۔۔۔ ابن شہاب کی روایت ہے کہ بنو قریظہ نے ابو سفیان اور اس کے اتحادیوں کی طرف غزوہ خندق کے موقع پر پیغام بھیجا کہ اپنی جگہ پر ثابت قدم رہو ہم عنقریب مسلمانوں کے پیچھے سے ان کے مرکز پر حملہ کریں گے یہ بات نعیم بن مسعود اشجعی نے سن لی نعیم نے رسول اللہ (صلی اللہ علیہ وآلہ وسلم) معاہدہ کر رکھا تھا نعیم اس وقت عیینہ بن حصن کے پاس تھا وہ اسی وقت رسول اللہ (صلی اللہ علیہ وآلہ وسلم) کی طرف چل دیا اور آپ کو وہ تمام خبر کردی جسے بنی قریظہ اتحادیوں کی طرف بھیجا چاہتے تھے نبی کریم (صلی اللہ علیہ وآلہ وسلم) نے فرمایا : شاید ہم ہی نے انھیں اس کا حکم دیا ہو نعیم رسول اللہ (صلی اللہ علیہ وآلہ وسلم) کی بات سن کر اٹھ گیا تاکہ غطفان تک پہنچا دے نعیم ایسا شخص تھا کہ اسے کوئی بات ہضم نہیں ہوتی تھی نعیم جب بنی غطفان کی طرف جانے لگا سیدنا حضرت عمر بن خطاب (رض) نے نبی کریم (صلی اللہ علیہ وآلہ وسلم) سے عرض کیا : یا رسول اللہ (صلی اللہ علیہ وآلہ وسلم) آپ نے یہ جو کچھ فرمایا ہے اگر یہ اللہ تعالیٰ کا حکم ہے تو اسے کر گزرئیے اگر یہ آپ کی رائے ہے تو بنی قریظہ کا معاملہ اس سے آسان تر ہے کہ آپ کچھ کہیں اور اس میں آپ پر اسے ترجیح دی جائے رسول اللہ (صلی اللہ علیہ وآلہ وسلم) نے فرمایا یہ ایک رائے ہے چونکہ جنگ ایک دھوکا اور چال ہے پھر نبی کریم (صلی اللہ علیہ وآلہ وسلم) نے نعیم کے پیچھے قاصد دوڑایا جب نعیم واپس آگیا آپ نے اس سے کہا : میں نے جو کچھ ابھی کہا ہے اس کا کسی سے تذکرہ نہ کرنا چنانچہ نعیم چلا گیا اور عینیہ بن حصن کے پاس جا پہنچا عینیہ کے پاس بنی غطفان کے لوگ بھی تھے نعیم نے کہا کیا تمہیں معلوم ہے کہ محمد (صلی اللہ علیہ وآلہ وسلم) نے جو کچھ بھی کیا ہے وہ حق ہے لوگوں نے جواب دیا نہیں کہا : محمد (صلی اللہ علیہ وآلہ وسلم) نے مجھے وہی بات بتائی ہے جسے بنو قریظہ نے تمہاری طرف بھیجا ہے ” کہ شاید ہم ہی نے انھیں اس کا حکم دیا ہے “ پھر محمد نے مجھے کسی سے تذکرہ کرنے سے منع کیا ۔ عینیہ ابو سفیان کے پاس آیا اور اسے نعیم کی کہی ہوئی بات بتلا دی ابو سفیان نے کہا : ہم بنی قریظہ کو پیغام بھیجیں گے اور ہم ان سے رہن کا مطالبہ کریں گے اگر انھوں نے ہمیں رہن دے دیا تو وہ سچے ہوں گے اور اگر انھوں نے رہن سے انکار کردیا تو لامحالہ وہ دھوکا کرنا چاہتے ہیں ، چنانچہ بنی قریظہ کے پاس ابو سفیان کا ایلچی آیا اور ان سے رہن کا مطالبہ کیا کہ اگر تم رہن دو گے تو تم محمد اور ان کے ساتھیوں کی مخالفت میں سچے ہو لہٰذا تم اپنے بچوں کو بطور رہن ہمارے حوالے کرو اور کل صبح لیتے آؤ بنی قریظہ نے کہا : اب ہفتہ کی رات داخل ہوچکی ہے لہٰذا ہمیں ایک دن کی مہلت دو تاکہ ہفتے کا د گزر جائے ۔ قاصد یہ پیغام لے کر ابو سفیان کے پاس واپس لوٹ آیا چنانچہ ابو سفیان اور دوسرے سرداروں نے کہا کہ یہ بنی قریظہ کی چال اور دھوکا ہے لہٰذا تم چلو ادھر سے اللہ تعالیٰ نے اتحادیوں پر آندھی بھیج دی حتی کہ ایک شخص بھی ایسا نہیں تھا جو اپنی سواری تک رسائی حاصل کر پاتا ۔ یہ اتحادیوں کی شکست تھی اسی وجہ سے علماء نے جنگ میں دھوکا اور چال چلنے کی رخصت دی ہے۔ (رواہ ابن جریر)