30126 ۔۔۔ ” مسند سلمہ بن اکوع “۔ ایاس بن سلمہ روایت کی ہے کہ میرے والد نے مجھے خبر دی ہے کہ میرے چچا نے غزوہ خیبر کے موقع پر مرحب یہودی کو مقابلہ کے لیے للکارا ۔ مرحب نے جواب میں یہ رجزیہ پڑھا۔ قد علمت خیبرانی مرحب شاکی السلاح بطل مجرب اذا الحروب اقبلت تلھب : پورا خیبر جانتا ہے کہ میں مرحب ہوں اسلحہ پوش بہادر اور تجربہ کار ہوں اس وقت کہ جب جنگوں کے شعلے بھڑک رہے ہو ۔ میرے چچا عامر نے جواب میں یہ رجز پڑھا : قد علمت خیبرانی عامر شاکی السلاح بطل مغامر : پورا خیبر جانتا ہے کہ میں عامر ہوں اسلحہ پوش بہادر اور نیزے سے کاری ضرب لگانے والا ہوں ۔ چنانچہ پھر دونوں میں دو دو وار ہوئے مرحب کی تلوار عامر (رض) کی ڈھال پر پڑی پھر اس کی اپنی تلوار گھٹنے پر لگی جس سے گھٹنا کٹ گیا اور اسی زخم سے اللہ کو پیارے ہوگئے حضرت سلحہ (رض) کہتے ہیں میری صحابہ کرام رضوان اللہ تعالیٰ عنہم اجمعین سے ملاقات ہوئی صحابہ کرام رضوان اللہ تعالیٰ عنہم اجمعین نے کہا : عامر کا عمل ضائع ہوگیا ، چونکہ اس نے اپنے آپ کو قتل کیا ہے میں نبی کریم (صلی اللہ علیہ وآلہ وسلم) کی خدمت میں حاضر ہوا اور عرض کیا : یا رسول اللہ (صلی اللہ علیہ وآلہ وسلم) عامر کا عمل باطل ہوگیا ؟ فرمایا : کون کہتا ہے میں نے عرض کیا : آپ کے صحابہ کرام رضوان اللہ تعالیٰ عنہم اجمعین میں سے کچھ لوگ کہتے ہیں آپ نے فرمایا : جس نے کہا ہے اس نے جھوٹ بولا بلکہ ان کے لیے دوہرا اجر وثواب ہے جب وہ خیبر کی طرف نکلے تھے صحابہ کرام رضوان اللہ تعالیٰ عنہم اجمعین کے ساتھ رجز پڑھتے رہے جبکہ نبی کریم (صلی اللہ علیہ وآلہ وسلم) ان کے درمیان سواریاں ہانک رہے تھے اور عامر (رض) کہہ رہے تھے ۔ تاللہ لولا اللہ ما اھت دینا ولا تصدقنا ولا صلینا ان الذین قد بغوا علینا اذا ارادو فتنۃ ابینا ونحن عن فضلک ما استغنینا فثبت الاقدام ان لاقینا وانزلن سکینۃ علینا “۔ بخدا ! اگر اللہ تعالیٰ کی توفیق نہ ہوتی ہم ہدایت نہ پاتے ہم صدقہ کرتے اور نہ نماز پڑھتے جن لوگوں نے ہمارے اوپر سرکشی کی ہے جب وہ کسی فتنہ کے درپے ہوتے ہیں ہم اس فتنے سے پہلو تہی کر جاتے ہیں ، ہم تیرے فضل و کرم سے بےنیاز نہیں ، ہمیں ثابت قدم رکھ اگر دشمن سے ہماری مدبھیڑ ہو اور ہمارے اوپر اپنی رحمت نازل فرما۔ رسول کریم (صلی اللہ علیہ وآلہ وسلم) نے یہ رجز سن کر فرمایا : یہ کون ہے ؟ صحابہ کرام رضوان اللہ تعالیٰ عنہم اجمعین نے کہا : یا رسول اللہ ! یہ عامر ہیں فرمایا : اللہ تعالیٰ تیری مغفرت کرے چنانچہ نبی کریم (صلی اللہ علیہ وآلہ وسلم) نے جس شخص کے لیے بھی مغفرت طلب کی ہے وہ ضرور شہید ہوا ہے جب سیدنا حضرت عمر بن خطاب (رض) نے یہ بات سنی عرض کیا : یا رسول اللہ (صلی اللہ علیہ وآلہ وسلم) کاش اگر آپ عامر سے کام لینے دیتے ، چنانچہ عامر (رض) پیروی حق کے لیے کھڑے ہوئے اور شہید ہوگئے ۔ سلمہ (رض) کہتے ہیں : پھر رسول اللہ (صلی اللہ علیہ وآلہ وسلم) نے مجھے سیدنا حضرت علی المرتضی (رض) کی طرف بھیجا اور فرمایا : میں آج ایک ایسے شخص کو جھنڈا دوں گا جو اللہ اور اس کے رسول سے محبت کرتا ہے اور اللہ اور اس کا رسول اس سے محبت کرتا ہے چنانچہ میں سیدنا حضرت علی المرتضی (رض) کو کھینچ کر لایا چونکہ انھیں آشوب چشم کی شکایت تھی نبی کریم (صلی اللہ علیہ وآلہ وسلم) نے ان کی آنکھوں میں لعاب دہن ڈالا اور جھنڈا انھیں دیا چنانچہ قلعہ سے مرحب تلوار لہراتا ہوا نمودار ہوا اور وہ یہ رجز پڑھ رہا تھا : قد علمت خیبرانی مرحب شاکی السلاح بطل مجرب اذا الحروب اقبلت تلھب : پورا خیبر مجھے جانتا ہے کہ میں مرحب ہوں اسلحہ پوش بہادر اور تجربہ کار ہوں جس وقت کہ جنگیں شعلہ زن ہوں ، جواب میں حضرت علیٰ (رض) نے یہ رجز پڑھا ۔ انا الذی سمتنی امی حیدرہ کلیث غابات کر یہ المنظرہ اوفیھم بالصاع کیل السندرہ میں وہ ہوں کہ جس کا نام میری ماں نے حیدر (شیر) رکھا ہے میں ایسا ہی ہوں جیسا کہ جنگلات کا شیر جو نہایت ڈراؤنہ سماں پیش کررہا ہوتا ہے میں صاع سے پیمانہ پورا پورا ناپ کے دیتا ہوں ۔ چنانچاہ حیدر کرار (رض) نے تلوار سے مرحب کا سر کچل دیا اور فتح سیدنا حضرت علی المرتضی (رض) کے دست راست پر ہوئی ۔ (رواہ ابن ابی شیبۃ)