3013: سورة حج : کیا تم جانتے ہو یہ کون سا دن ہے ؟ (روح المعانی میں ہے صحابہ کرام (رض) نے جوابا عرض کیا : اللہ اور اس کا رسول بہتر جانتے ہیں) پھر فرمایا یہ دن وہ ہے جس میں اللہ تعالیٰ آدم (علیہ السلام) کو فرمائی گے : اے آدم (علیہ السلام) ! کھڑا ہو اور جہنم کا حصہ نکال۔ آدم (علیہ السلام) عرض کریں گے اے پروردگار ! جہنم کا حصہ کتنا ہے ؟ پروردگار فرمائیں گے : ہر ہزار میں سے نو سو ننانوے جہنم کا حصہ ہیں اور ایک جنت کے لیے ہے۔
یہ بات مسلمانوں کو شاق گزری تب آپ (صلی اللہ علیہ وآلہ وسلم) نے فرمایا : سیدھے سیدھے رہو، قریب قریب رہو اور مجھ سے خوشخبری سنو ! قسم ہے اس ذات کی جس کے ہاتھ میں میری جان ہے تم لوگوں میں ایسے ہو جیسے اونٹ کے پہلو میں تل یا جانور کے ہاتھ میں معمولی گھاس۔ اور یقین کرو تمہارے ساتھ دو ایسی چیزیں پیدا کی گئی ہیں جو کسی کے ساتھ بھی ہوں اس کو کثیر تعداد کردیتی ہیں۔ یاجوج ماجوج اور جن و انس کے کفار۔ (اور نو سو ننانوے انہی میں سے ہوں گے اور ایک مسلمانوں میں سے ہوگا انشاء اللہ) عبد بن حمید، مستدرک الحاکم بروایت انس) ۔
فرمایا : جب قرآن کی یہ آیت نازل ہوئی : یا ایہا الناس اتقوا ربکم ان زلزلۃ الساعۃ شیء عظیم۔ الحج : 1
اے لوگو ! اپنے پروردگار سے ڈرو، بیشک قیامت کا جھٹکا عظیم شے ہے۔
تب آپ (صلی اللہ علیہ وآلہ وسلم) نے مذکورہ بالا ارشاد صادر فرمایا۔ (مسند احمد، السنن الترمذی حسن صحیح، الطبرانی فی الکبیر، مستدرک الحاکم، بروایت عمران بن حصین مستدرک ابن عباس (رض))