30139 ۔۔۔ حضرت براء (رض) کی روایت ہے کہ جب نبی کریم (صلی اللہ علیہ وآلہ وسلم) کو بیت اللہ میں جانے سے روک دیا گیا تو آپ نے اہل مکہ کے ساتھ صلح کردی اور اس کی شرائط میں یہ تھا کہ آئندہ صرف تین دن رہیں مسلمان تلواریں نیام میں کرکے آئیں اہل مکہ سے اپنے ساتھ کسی شخص کو نہیں لے کر جائیں گے اور جو شخص مکہ میں رہنا چاہے ، اسے نہیں روکیں گے آپ (صلی اللہ علیہ وآلہ وسلم) نے حضرت علی (رض) سے فرمایا : یہ شرائط لکھ دو چنانچہ معاہدہ نامہ کی ابتداء یوں کی : بسم اللہ الرحمن الرحیم یہ وہ معاہدہ ہے جو محمد رسول اللہ (صلی اللہ علیہ وآلہ وسلم) نے کیا ہے مشرکین نے اسے پر اعتراض کیا کہ اگر ہم آپ کو اللہ کا رسول تسلیم کرتے آپ کی اتباع کرلیتے البتہ یوں لکھو ” محمد بن عبداللہ “ آپ (صلی اللہ علیہ وآلہ وسلم) نے سیدنا حضرت علی المرتضی (رض) سے فرمایا : یہ جگہ مجھے دکھاؤ چنانچہ آپ نے اپنے دست اقدس سے مٹا دیا اور اس کی بجائے ابن عبداللہ لکھوایا چنانچہ تین دن تک قیام کیا جب تیسرا دن ہوا مشرکین نے سیدنا حضرت علی المرتضی (رض) سے کہا کہ اپنے صاحب سے کہو : آج شرط کا تیسرا اور آخری دن ہے لہٰذا ان سے کہو کہ چلے جائیں سیدنا حضرت علی المرتضی (رض) نے آپ سے اس کا تذکرہ کیا : آپ نے فرمایا : جی ہاں چنانچہ آپ یہاں سے کوچ کرگئے ۔ (رواہ ابن ابی شیبۃ)