30170 ۔۔۔ عبداللہ بن زبیر (رض) کی روایت ہے کہ فتح مکہ کے دن صفوان بن امیہ کی بیوی بغوم بنت معدل نے اسلام قبول کرلیا جب کہ صفوان بن امیہ (رض) بھاگ نکلے اور ایک گھاٹی میں آ چھپے اپنے غلام یسار سے باربار کہتے کہ (جب کہ ان کے ساتھ غلام کے علاوہ اور کوئی نہیں تھا تیرا ناس ہو دیکھ ذرہ تجھے کوئی نظر آ رہا ہے غلام نے کہا : یہ رہا عمیر بن وہب صفوان (رض) نے کہا میں عمیر کو کیا کروں گا بخدا یہ تو مجھے قتل کرنے آیا ہے س نے میرے خلاف محمد کی مدد کی ہے عمیر (رض) صفوان (رض) کے پاس آن پہنچے صفوان (رض) نے کہا : اے عمیر (رض) ابھی تک جو کچھ تو کر گزرا ہے اس پر بس نہیں کرتا اب مجھے قتل کرنے کے لیے یہاں تک آدھمکا ہے عمیر (رض) نے کہ اے ابو وہب میں تجھ پر فدا جاؤں میں ایسی ہستی کے پاس سے آیا ہوں جو سب سے زیادہ مہربان اور سب سے زیادہ صلہ رحمی کرنے والا ہے۔ قبل ازیں عمیر نے نبی کریم (صلی اللہ علیہ وآلہ وسلم) سے کہا تھا نبی کریم (صلی اللہ علیہ وآلہ وسلم) میری قوم کا سردا بھاگ نکلا ہے تاکہ اپنے آپ کو سمندر میں ڈال دے وہ نہایت خوفزدہ تھا کہ آپ اسے امن نہیں دیں گے لہٰذا میں آپ سے ملتمس ہوں کہ آپ امن دے دیں نبی کریم (صلی اللہ علیہ وآلہ وسلم) نے فرمایا جاؤ میں نے صفوان (رض) کو امن دے دیا ۔ چنانچہ عمیر (رض) صفوان کے پیچھے چل پڑے اور ان کے پاس پہنچ کر کہا تمہیں نبی کریم (صلی اللہ علیہ وآلہ وسلم) نے امن دے دیا ہے صفوان (رض) نے کہا : بخدا ! میں اس وقت تک تیرے ساتھ نہیں جاؤں گا جب تک کہ تم میرے پاس کوئی نشانی نہیں لے کر آؤ گے عمیر (رض) نے واپس لوٹ کر نبی کریم (صلی اللہ علیہ وآلہ وسلم) سے اس کا تذکرہ کیا نبی کریم (صلی اللہ علیہ وآلہ وسلم) نے فرمایا : میرا عمامہ لیتے جاؤ آپ کا عمامہ وہی چادر تھی جسے نبی کریم (صلی اللہ علیہ وآلہ وسلم) اوڑھ کر مکہ میں داخل ہوئے تھے چنانچہ عمیر (رض) دوبارہ عمامہ لیے صفوان (رض) کی تلاش میں نکل پڑے اور جب ان کے پاس پہنچے کہا : اے ابو وہب میں ایسی ہستی کے پاس سے آیا ہوں جو سب سے افضل سب سے زیادہ مہربان اور سب سے زیادہ مہربان اور سب سے زیادہ بردبار ہے اس کی عزت تیری عزت ہے اس کی بزرگی تیری بزرگی ہے اس کی بادشاہت تیری بادشاہت ہے تمہارا خاندان ایک میں تمہیں اللہ تبارک وتعالیٰ کا واسطہ دیتا ہوں کہ بےخوف ہو کر میرے ساتھ چل پڑو۔ صفوان (رض) نے کہا : مجھے خوف ہے کہ مجھے قتل کردیا جائے گا عمیر (رض) نے کہا : نبی کریم (صلی اللہ علیہ وآلہ وسلم) نے تمہیں اسلام کی دعوت دی ہے اگر تم اسلام میں داخل ہوجاؤ تو بہت اچھا ورنہ نبی کریم (صلی اللہ علیہ وآلہ وسلم) سے دو مہینوں کی مہلت لے لینا نبی کریم (صلی اللہ علیہ وآلہ وسلم) تمہیں مہلت دے دیں گے چونکہ آپ نہایت مہربان اور نہایت صلہ رحمی کرنے والے ہیں جب کہ نبی کریم (صلی اللہ علیہ وآلہ وسلم) نے تمہارے پاس اپنی چادر بھیجی ہے یہ وہی چادر ہے جسے آپ نہایت مہربان اور نہایت صلہ رحمی کرنے والے ہیں جب کہ نبی کریم (صلی اللہ علیہ وآلہ وسلم) نے تمہارے پاس اپنی چادر بھیجی ہے یہ وہی چادر ہے جسے آپ اوڑھ کر مکہ میں داخل ہوئے تھے صٖفوان (رض) نے چادر پہچان لی اور کہا ہاں یہ وہی چادر ہے چنانچہ صفوان (رض) واپس ہوئے اور جب نبی کریم (صلی اللہ علیہ وآلہ وسلم) کے پاس پہنچے تو لوگوں کو عصر کی نماز پڑھا رہے تھے صفوان (رض) باہر ہی رک گئے ؟ اور کہا : مسلمان دن میں کتنی نماز میں پڑھتے ہیں ؟ عمیر (رض) نے جواب دیا : پانچ نمازیں پڑھتے ہیں پھر پوچھا : کیا مسلمانوں کو محمد نماز پڑھاتے ہیں ؟ جواب دیا جی ہاں جب نبی کریم (صلی اللہ علیہ وآلہ وسلم) نے سلام پھیرا تو صفوان (رض) نے چلا کر کہا : اے محمد ! عمیر بن وہب میرے پاس تمہاری چادر لے کر آیا ہے اور اس کا دعوی ہے کہ تم نے مجھے واپس لوٹ آنے کی دعوت دی ہے اگر تم راضی ہو تو ٹھیک ورنہ مجھے دو مہینے کی مہلت دے دو آپ (صلی اللہ علیہ وآلہ وسلم) نے فرمایا : اے ابو وہب ! سواری سے نیچے اترو صفوان (رض) نے کہا : بخدا میں اس وقت تک نیچے نہیں اتروں گا جب تک تم معاملہ صاف نہ کر دو ۔ آپ (صلی اللہ علیہ وآلہ وسلم) نے فرمایا : بلکہ تمہیں چار ماہ تک مہلت ہے۔ صفوان (رض) سواری سے نیچے اتر آئے ۔ پھر آپ نے ھوازن پر چڑھائی کی جبکہ صفوان (رض) آپ کے ساتھ تھے اور ابھی تک اسلام قبول نہیں کیا تھا آپ (صلی اللہ علیہ وآلہ وسلم) نے صفوان (رض) سے اسلحہ مستعار لینا چاہا، عرض کیا : کیا آپ خوشی سے اور رضا مندی سے لینا چاہتے ہیں یا زبردستی نبی کریم (صلی اللہ علیہ وآلہ وسلم) نے فرمایا بلکہ عاریۃ لینا چاہتا ہوں یہ اسلحہ یعنی 100 (سو) زرہیں قابل واپسی ہوں گی چنانچہ صفوان (رض) نے زرہیں عاریۃ دے دیں آپ (صلی اللہ علیہ وآلہ وسلم) نے انھیں بھی حنین اور طائف ساتھ جانے کا حکم دیا چنانچہ صفوان (رض) آپ (صلی اللہ علیہ وآلہ وسلم) کے ساتھ حنین اور طائف میں رہے پھر رسول اللہ (صلی اللہ علیہ وآلہ وسلم) جعرانہ واپس آگئے اسی اثناء میں آپ (صلی اللہ علیہ وآلہ وسلم) مال غنیمت میں چل پھر رہے تھے اور صفوان بن امیہ (رض) بھی آپ کے ساتھ تھے اور مال غنیمت سے بھری ہوئی گھاٹی کو دیکھے جا رہے تھے جو جانوروں بکریوں وغیرہ اموال سے اٹی پڑی تھی صفوان (رض) انہماک سے مال غنیمت دیکھے جا رہے تھے جبکہ نبی کریم (صلی اللہ علیہ وآلہ وسلم) کنکھیوں سے صفوان (رض) کو دیکھ رہے تھے پھر فرمایا : اے ابو ہب ! کیا یہ گھاٹی مال سے بھری ہوئی تمہیں اچھی لگتی ہے ؟ عرض کیا جی ہاں آپ (صلی اللہ علیہ وآلہ وسلم) نے فرمایا : یہ سارا مال تمہارا ہے پھر صفوان (رض) نے کہا : اتنی بڑی سخاوت کا مظاہرہ سوائے نبی کے کوئی نہیں کرسکتا میں گواہی دیتا ہوں کہ اللہ تعالیٰ کے سوا کوئی معبود نہیں اور گواہی دیتا ہوں کہ محمد اللہ تعالیٰ کے بندے اور اس کے رسول ہیں ، چنانچہ اسی جگہ اور اسی لمحے اسلام لے آئے ۔ (رواہ الواقدی وابن عساکر)