30173 ۔۔۔ واقدی عبداللہ بن جعفر یعقوب بن عتبہ عکرمہ کی سند سے ابن عباس (رض) کی روایت ہے کہ جب رسول کریم (صلی اللہ علیہ وآلہ وسلم) مقام مرا الظہران پر پہنچے حضرت عباس بن عبدالمطلب نے کہا : افسوس ہے قریش پر اللہ کی قسم اگر رسول اللہ (صلی اللہ علیہ وآلہ وسلم) مکہ میں عنوۃ (غلبہ پاکر) داخل ہوئے تو قریش پر ہلاکت آئے گی میں نے نبی کریم (صلی اللہ علیہ وآلہ وسلم) کا خچر پکڑا اور اس پر سوار ہوگیا آپ (صلی اللہ علیہ وآلہ وسلم) نے فرمایا : خطاب یا کسی اور شخص کو تلاش کرکے لے آؤ تاکہ اسے میں قریش کے پاس بھیجوں اور وہ آپ (صلی اللہ علیہ وآلہ وسلم) سے آکر ملاقات کرلیں قبل ازیں کہ رسول اللہ (صلی اللہ علیہ وآلہ وسلم) مکہ میں عنوۃ داخل ہوں عباس (رض) کہتے ہیں : بخدا ! میں جھاڑیوں میں گھوم پھر کر کسی انسان کو ڈھونڈ رہا تھا یکایک میں نے باتوں کی آواز سنی کوئی کہہ رہا تھا : بخدا میں نے رات کو جگہ آگ جلتی دیکھی ہے بدیل بن ورقاء نے کہا : یہ تو قبیلہ خزاعہ ہے ابو سفیان نے کہا : خزاعہ کی تعداد بہت تھوڑی ہے انھیں اتنی زیادہ جگہوں میں آگ جلانے کی ہمت کیسے ہوئی اچانک میں دیکھتا ہوں کہ ابو سفیان ہے میں نے آواز دی : اے ابو حنطلہ ! اس نے جواب دیا : جی ہاں اے ابو الفضل اس نے میری آواز پہچان لی اور کہا : میرے ماں باپ تجھ پر فدا ہوں یہاں کیا کر رہے ہو ؟ میں نے کہا : تیری ہلاکت ہو یہ رسول اللہ (صلی اللہ علیہ وآلہ وسلم) ہیں اور ان کے ساتھ دس ہزار کا لشکر ہے ابو سفیان نے کہا میری ماں باپ فدا ہوں کوئی حیلہ ہوسکتا ہے ؟ عباس (رض) نے کہا : یہ ہے خچر میرے پیچھے سوار ہوجائیں تجھے نبی کریم (صلی اللہ علیہ وآلہ وسلم) کی خدمت میں حاضر کروں گا ورنہ بصورت دیگر تو ہتھے چڑھ گیا قتل سے کم تیری سزا نہیں ہوگی ابو سفیان نے کہا : بخدا میری بھی یہی رائے ہے جبکہ بدیل اور حکیم واپس لوٹ گئے ۔ ابو سفیان میرے پیچھے بیٹھا ، میں اسے لے کر چل پڑا جب بھی مسلمانوں کی کسی آگ کے پاس سے گزرتا مسلمان پوچھتے یہ کون ہے جب مجھے دیکھتے کہتے یہ رسول اللہ (صلی اللہ علیہ وآلہ وسلم) کے چچا ہیں حتی کہ میں عمر بن خطاب کی جلائی ہوئی آگ کے پاس سے گزرا جب عمر (رض) نے مجھے دیکھا فورا کھڑے ہوگئے اور کہا : یہ کون ہے ؟ میں نے کہا : میں عباس ہوں عمر (رض) نے جو غور سے دیکھا تو میرے پیچھے ابوسفیان کو بیٹھے دیکھا اور کہا : بخدا یہ تو اللہ اور اس کے رسول کا دشمن ہے الحمد للہ ! بغیر کسی عہد اور قرار کے ہاتھ آگیا پھر کیا تھا عمر (رض) نے تلوار سونت لی اور میرے پیچھے ہو لیے جبکہ میں نے خچر کو کو چا دے کر ایڑ لگا دی چنانچہ ہم اکٹھے ہی رسول اللہ (صلی اللہ علیہ وآلہ وسلم) کے پاس پہنچے ۔ عمر (رض) میرے پیچھے تھے جونہی آپ (صلی اللہ علیہ وآلہ وسلم) کے پاس پہنچے کہا : یا رسول اللہ (صلی اللہ علیہ وآلہ وسلم) یہ رہا اللہ اور اس کے رسول کا دشمن بغیر کسی عہد و پیمان کے ہمارے ہاتھ لگ گیا ہے مجھے چھوڑیئے تاکہ میں اس کی گردن اڑا دوں ۔ عباس (رض) کہتے ہیں میں نے کہا : یا رسول اللہ ! میں اسے پناہ دے چکا ہوں پھر میں رسول اللہ (صلی اللہ علیہ وآلہ وسلم) کے ساتھ لگا رہا جب عمر (رض) نے زیادہ ہی اصرار کیا میں نے کہا : اے عمر ! رک جاؤ اگر کوئی شخص بنی عدی بن کعب سے ہوتا تم ایسی بات نہ کہتے البتہ یہ بنی عبدمناف میں سے ہے تب تمہیں جرات ہو رہی ہے۔ عمر (رض) نے کہا : اے ابو الفضل ! چھوڑو بخدا ! تمہارا اسلام مجھے خطاب کے کسی بیٹے کے اسلام قبول کرنے سے زیادہ مجبوب ہے نبی کریم (صلی اللہ علیہ وآلہ وسلم) نے فرمایا : اسے لے چلو میں نے اسے پناہ دے دی میں نے اسے تمہاری وجہ سے پناہ دی ہے اور اسے اپنے پاس رات بسر کراؤ اور صبح دوبارہ ہمارے پاس لاؤ۔ صبح ہوتے ہی حضرت عباس (رض) ابو سفیان کو لے کر آپ کی خدمت میں حاضر ہوئے آپ (صلی اللہ علیہ وآلہ وسلم) نے جوں ہی ابو سفیان کو دیکھا فرمایا : افسوس ! اے ابو سفیان ! لاالہ الا اللہ کے اقرار کا ابھی وقت نہیں آیا ؟ ابو سفیان نے کہا : میرے ماں باپ آپ پر فدا ہوں آپ نہایت ہی حلیم اور کریم اور نہایت ہی صلہ رحمی کرنے والے ہیں خدا کی قسم اگر اللہ کے سوا اور کوئی معبود ہوتا تو آج ہمارے کچھ کام آتا اور آپ کے مقابلہ میں اس سے مدد چاہتا ۔ نبی کریم (صلی اللہ علیہ وآلہ وسلم) نے فرمایا : افسوس اے ابو سفیان ! کیا تیرے لیے ابھی وقت نہیں آیا کہ تو مجھے اللہ تعالیٰ کا رسول تسلیم کرے ؟ ابو سفیان نے کہا : میرے ماں باپ آپ پر فدا ہوں بیشک آپ نہایت حلیم وکریم اور سب سے زیادہ صلہ رحمی کرنے والے ہیں ابھی تک مہربانی کر رہے ہیں ابھی مجھے اس میں ذرہ تردد ہے کہ آپ نبی ہیں یا نہیں۔ حضرت عباس (رض) کہتے ہیں ! میں نے ابو سفیان سے کہا : تیرا ناس ہو گواہی دو کہ اللہ کے سوا کوئی معبود نہیں اور محمد اللہ کے رسول ہیں بخدا قتل کئے جانے سے قبل اس کا اقرار کرلو چنانچہ ابو سفیان ابو سفیان نے کلمہ شہادت پڑھا اور کہا ” اشھد ان لا الہ الا اللہ وان محمد عبدہ ، ورسولہ “۔ عباس (رض) نے کہا : یا رسول اللہ ! آپ کو معلوم ہے کہ ابو سفیان صاحب جاہ اور صاحب شرف سردار ہے اور فخر کو پسند کرتا ہے لہٰذا آپ اس کے لیے کوئی ایسی شیء عطیہ کریں جو اس کے لیے باعث عزت وافتخار ہو آپ نے فرمایا : جی ہاں جو شخص ابو سفیان کے گھر میں داخل ہوگا وہ امن میں ہوگا اور جو شخص اپنا دروازہ بند رکھے گا وہ بھی امن میں ہوگا پھر آپ (صلی اللہ علیہ وآلہ وسلم) نے عباس (رض) سے فرمایا : آپ اسے لے کر گھاٹی میں سرراہ کھڑے ہوجائیں تاکہ یہ اسلامی لشکر کی شان و شوکت دیکھ سکے چنانچہ جب میں ابو سفیان کو لے کر گھاٹی میں اونچی جگہ کھڑا ہو اس نے کہا : اے بنی ہاشم کیا ہم سے دھوکا کرو گے ؟ عباس (رض) نے جواب دیا : جو لوگ نبوت سے سرفراز ہوتے ہیں وہ دھوکا نہیں کرتے البتہ مجھے تم سے ایک حاجت ہے۔ ابو سفیان نے کہا : اگر ایسی کوئی بات تھی تو مجھے پہلے کیوں نہیں بتایا ، عباس (رض) نے کہا : میں نہیں سمجھتا کہ تم اس راستے سے گزرتے چنانچہ نبی کریم (صلی اللہ علیہ وآلہ وسلم) نے صحابہ کرام رضوان اللہ تعالیٰ عنہم اجمعین کو کوچ کرنے کا حکم دیا اتنے میں قبائل اپنے قائدین کے ساتھ اور مختلف لشکر اپنے جھنڈوں کے ساتھ امڈ پڑے ۔ سب سے پہلے حضرت خالد بن ولید (رض) ایک ہزار کے لگ بھگ کا دستہ لے کر گزرے حضرت خالد (رض) بنی سلیم پر کمان کر رہے تھے ان کا ایک جھنڈا حضرت عباس بن مرداس (رض) نے اٹھا رکھا تھا اور دوسرا حضرت خفاف بن ندیہ (رض) نے اٹھا رکھا تھا تیسرا جھنڈا حجاج بن علاط (رض) نے اٹھایا ہوا تھا ابو سفیان نے پوچھا : یہ کون لوگ ہیں ؟ عباس (رض) نے جواب دیا ، یہ خالد بن ولید ہے ابو سفیان نے کہا : یہ لڑکا فرمایا جی ہاں ۔ جب حضرت خالد (رض) عباس (رض) اور ابو سفیان کے پاس سے گزرے تو ان کے دستے نے تین مرتبہ نعرہ تکبیر بلند کیا پھر آگے چل پڑے پھر ان کے بعد حضرت زبیر بن عوام (رض) پانچ سو کا دستہ لے کر گزرے ان میں مہاجرین اور مضافات کے لوگ شامل تھے ان کے پاس سیاہ رنگ کا جھنڈا تھا جب ابو سفیان کے پاس سے دستہ گزرنے لگا تین بار نعرہ تکبیر بلند کیا ابو سفیان نے کہا : یہ کون ہے عباس (رض) نے کہا : یہ زبیر بن عوام (رض) ابو سفیان نے کہا : یہ تمہارا بھانجا ہے فرمایا : جی ہاں پھر قبیلہ غفارکا دستہ گزرا اور یہ آٹھ سو افراد تھے ان کا جھنڈا حضرت ابو ذر غفاری (رض) نے اٹھا رکھا تھا جب یہ دستہ ابو سفیان کے پاس سے گزرا اس نے بھی تین بار نعرہ تکبیر لگایا اور پھر آگے نکل گیا ابوسفیان نے کہا : یہ کون لوگ ہیں ؟ عباس (رض) نے جواب دیا : یہ بنو غفار ہیں ابو سفیان نے کہا : مجھے ان سے کیا غرض : پھر قبیلہ اسلم گزرا یہ دستہ چار نفوس پر مشتمل تھا ان کے پاس دو جھنڈے تھے ایک جھنڈا بریدہ بن خصیب (رض) نے اٹھا رکھا تھا اور دوسرا ناجیہ بن عجم (رض) نے جب یہ دستہ ابو سفیان کے قریب پہنچا اس نے تین بار نعرہ تکبیر بلند کیا ابو سفیان نے کہا : یہ کون لوگ ہیں ؟ عباس (رض) نے کہا : یہ قبیلہ اسلم ہے ابو سفیان نے کہا : اے ابو فضل مجھے قبیلہ اسلم سے کیا غرض میری ان کے ساتھ کوئی کھنڈت نہیں عباس (رض) نے کہا یہ مسلمان لوگ ہیں جو اسلام میں داخل ہوئے ہیں۔ پھر بنوکعب کا پانچ سو افراد کا دستہ گزرا ان کا جھنڈا بشر بن شیبان نے اٹھا رکھا تھا پوچھا یہ کون لوگ ہیں ؟ فرمایا : یہ بنوکعب بن عمرو ہیں کہا : جی ہاں یہ محمد کے حلیف لوگ ہیں جب یہ دستہ ابو سفیان کے قریب پہنچا اس نے بھی تین بار نعرہ تکبیر لگایا ۔ پھر مزنیہ کا دستہ گزرا یہ دستہ ایک ہزار سپاہیوں پہ مشتمل تھا ان کے پاس تین جھنڈے تھے اور سو کے لگ بھگ گھوڑے تھے ایک جھنڈا نعمان بن مقرن نے دوسرا بلال بن حارثنی اور تیسرا عبداللہ بن عمر (رض) نے اٹھا رکھا تھا جب یہ لوگ ابو سفیان کے محاذی ہوئے انھوں نے بھی نعرہ تکبیر لگایا پوچھا یہ کون لوگ ہیں فرمایا : یہ قبیلہ مزینہ کے لوگ ہیں ابو سفیان نے کہا : اے ابو فضل مجھے مزینہ سے کیا غرض : یہ اپنا پورا جمگھٹا لے آچکے ہیں پھر جہنیہ کا دستہ گزرا جو آٹھ سو نفوس پر مشتمل تھا ان میں چار جھنڈے تھے ایک جھنڈا ابو زرعہ معبد بن خالد کے پاس تھ دوسر سوید بن صخر کے پاس تیسر رافع بن مکیث کے پاس چوتھا عبدا اللہ بن بدر کی پاس جب یہ لوگ ابو سفیان کے محاذی ہوئے انھوں نے بھی تین بار بار آواز بلند نعرہ تکبیر لگایا ۔ پھر کنایہ بنولیث ضمرہ اور سعد بن بکر دو سو کے دستہ میں گزرے ان کا جھنڈا حضرت ابو واقدلیثی (رض) نے اٹھا رکھا تھا جب یہ دستہ ابو سفیان نے کہا نبی کریم (صلی اللہ علیہ وآلہ وسلم) جی ہاں یہ نحوست والے لوگ ہیں انہی کی وجہ سے تجھ سے ہمارے اوپر چڑھائی کی ہے۔ پھر ابو سفیان نے کہا : بخدا ! اس کے متعلق مجھ سے نہ مشورہ لیا گیا اور نہ ہی میں اسے ناپسند کرتا ہوں لیکن یہ ایک معاملہ ہے جو تقدیر میں لکھاجا چکا ہے حضرت عباس (رض) نے کہا اللہ تبارک وتعالیٰ نے نبی کریم (صلی اللہ علیہ وآلہ وسلم) کو تمہارے پر چڑھایا ہے اور تم سبھی اسلام میں داخل ہوئے ہو۔ واقدی عبداللہ بن عامر ابو عمرو بن حماس سے مروی ہے کہ پھر بنولیث گزرے ان کی تعداد دو سو پچاس (250) تھی ان کی جھنڈا صعب بن جثامہ (رض) نے اٹھا رکھا تھا جب یہ دستہ ابو سفیان کے پاس سے گزرا اس نے بھی تین بار نعرہ تکبیر بلند کیا : ابو سفیان نے کہا یہ کون لوگ ہیں عباس (رض) نے کہا یہ بنولیث ہیں پھر قبیلہ اتجع گزرا یہ آخری دستہ تھا س میں تین سو نفوس شامل تھے ان کا جھنڈا معقل بن سنان (رض) نے اٹھا رکھا تھا دوسرا جھنڈا نعیم بن مسعود (رض) کے پاس تھا ابوسفیان نے کہا یہ لوگ نبی کریم (صلی اللہ علیہ وآلہ وسلم) کے عرب بھر میں سب سے زیادہ مخالف تھے عباس (رض) نے کہا : اللہ تبارک وتعالیٰ نے ان کے دلوں میں اسلام ڈال دیا ہے یہ اللہ تبارک وتعالیٰ کا فضل ہے ابو سفیان نے کہا : ابھی تک نبی کریم (صلی اللہ علیہ وآلہ وسلم) نہیں آئے ؟ عباس (رض) نے کہا : اگر تم اس دستہ کو دیکھ لو جس میں نبی کریم (صلی اللہ علیہ وآلہ وسلم) ہیں تو تم اسلحہ گھوڑے اور بےمثال مردوں کو دیکھو گے جس کی طاقت کی مثال کہیں نہیں ملتی ابو سفیان نے کہا : میرا خیال ہے کہ یہ طاقت کسی کے پاس نہیں ۔ جب نبی کریم (صلی اللہ علیہ وآلہ وسلم) کا دستہ نمودار ہوا تو یوں لگا جیسے طوفان بلاخیز امڈ آیا ہو گھوڑے غبار اڑتے ہوئے چلے آرہے تھے چنانچہ جو شخص بھی گزرا ابوسفیان کہتا : محمد نہیں گزرے ؟ عباس (رض) کہتے ہیں حتی کہ آپ (صلی اللہ علیہ وآلہ وسلم) اپنی قصواء نامی اونٹنی پر سوار تشریف لائے آپ کے ایک طرف ابوبکر (رض) اور دوسری طرف اسید بن حضیر (رض) تھے آپ (صلی اللہ علیہ وآلہ وسلم) ان دونوں سے باتیں کر رہے تھے حضرت عباس (رض) نے کہا : یہ ہیں رسول اللہ ان کے دستہ میں مہاجرین و انصار ہیں یہ دستہ چاق وچوبند دستہ ہے اور لوہے کی دیوار کی مانند ہے حضرت عمر (رض) بھی اسی دستے میں تھے انھوں نے زرہ پہن رکھی تھی اور گرجدار آواز سے باتیں کر رہے تھے ابو سفیان نے کہا : اے ابو فضل ! یہ باتیں کون کررہا ہے جواب دیا یہ عمر بن خطاب (رض) ہیں ابو سفیان نے کہا : بنو عدی کی شان و شوکت بڑھ گئی ہے حالانکہ ان کا قبیلہ قلیل اور بےمقام بےمرتبہ تھا عباس (رض) نے کہا : اے ابوسفیان اللہ تعالیٰ جسے چاہتا ہے بلندی عطا کرتا ہے عمر بھی ان لوگوں میں سے ہیں جنہیں اسلام نے عزت و شوکت عطا کی ہے۔ اس دستے میں دو ہزار زرہ پوش تھے نبی کریم (صلی اللہ علیہ وآلہ وسلم) نے اپنا جھنڈا حضرت سعد بن عبادہ (رض) کو دیا ہوا تھا اور سعد (رض) دستے کے آگے آگے جا رہے تھے جب حضرت سعد (رض) ابوسفیان کے پاس سے گزرے آواز دی : اے ابو سفیان ! آج کا دن لڑائی کا دن ہے آج کعبہ میں قتل و قتال حلال ہوگیا آج کے دن اللہ تعالیٰ قریش کو ذلیل ورسوا کرے گا چنانچہ جب نبی کریم (صلی اللہ علیہ وآلہ وسلم) ابوسفیان کے پاس سے گزرے ابوسفیان نے کہا : یا رسول اللہ (صلی اللہ علیہ وآلہ وسلم) کیا آپ نے اپنی قوم کو قتل کرنے کا حکم دیا ہے ؟ چونکہ سعد اور ان کے ساتھیوں کا یہی خیال ہے۔ آپ (صلی اللہ علیہ وآلہ وسلم) نے بھی وہی حضرت سعد والی بات کہی کہ اے ابوسفیان آج لڑائی کا دن ہے آج کے دن کعبہ میں قتل و قتال حلال ہے آج اللہ تعالیٰ قریش کو ذلیل ورسوا کرے گا ابوسفیان نے کہا میں آپ کو اپنی قوم کے متعلق اللہ تعالیٰ کا واسطہ دیتا ہوں آپ لوگوں میں سب سے زیادہ مہربان اور سب سے زیادہ صلہ رحمی کرنے والے ہیں چنانچہ حضرت عبدالرحمن بن عوف اور سیدنا حضرت عثمان ذوالنورین (رض) نے عرض کیا : یا رسول اللہ (صلی اللہ علیہ وآلہ وسلم) ہمیں سعد پر اعتماد نہیں وہ قریش پر حملہ کر دے گا نبی کریم (صلی اللہ علیہ وآلہ وسلم) نے فرمایا : اے ابوسفیان آج کا دن رحمت و مہربانی کا دن ہے آج کے دن اللہ تبارک وتعالیٰ قریش کو عزت دے گا نبی کریم (صلی اللہ علیہ وآلہ وسلم) نے پیغام بھیج کر حضرت سعد (رض) کو معزول کردیا اور جھنڈا ان سے لے کر حضرت قیس (رض) کو دے دیا جب سعد (رض) کو جھنڈا سپرد کرنے کا حکم ملا آپ (صلی اللہ علیہ وآلہ وسلم) نے قاصد سے انکار کردیا اور کہا میں جھنڈا تب دوں گا جب میں کوئی نشانی دیکھوں گا تاہم رسول اللہ (صلی اللہ علیہ وآلہ وسلم) نے اپنا عمامہ بھیجا حضرت سعد (رض) نے عمامہ دیکھ کر جھنڈا اپنے بیٹے قیس (رض) کو دے دیا ۔ (رواہ ابن عساکر)