30198 ۔۔۔ محمد بن حنیفہ (رض) سے مروی ہے کہ ایک دن نبی کریم (صلی اللہ علیہ وآلہ وسلم) اپنے ایک حجرے سے باہر تشریف لائے اور دروازے پر بیٹھ گئے آپ کی عادت مبارکہ تھی کہ جب تنہائی میں بیٹھے تو آپ کے پاس کوئی نہیں آتا تھا تاوقتیکہ آپ خود نہ بلا لیں چنانچہ تھوڑی دیر بعد فرمایا : میرے پاس ابوبکر کو بلا لاؤ صحابہ کرام رضوان اللہ تعالیٰ عنہم اجمعین سیدنا حضرت ابوبکر صدیق (رض) کو بلا لائے اور آپ (صلی اللہ علیہ وآلہ وسلم) کے سامنے بیٹھ گئے آپ (صلی اللہ علیہ وآلہ وسلم) سیدنا حضرت ابوبکر صدیق (رض) سے کافی دیر تک سرگوشیاں کرتے رہے پھر سامنے سے اٹھا کر اپنے دائیں یا بائیں بٹھا رہے پھر فرمایا : عمر کو بلاؤ سیدنا حضرت عمر بن خطاب (رض) سیدنا حضرت ابوبکر صدیق (رض) کے پاس بیٹھ گئے اور آپ ان سے بھی کافی دیر تک سرگوشیاں کرتے رہے دوران گفتگو سیدنا حضرت عمر بن خطاب (رض) کی آواز بلند ہوگئی وہ کہہ رہے تھے یا رسول اللہ (صلی اللہ علیہ وآلہ وسلم) اہل مکہ کفر کا سرغنہ ہیں ان کا گمان ہے کہ آپ جادو گر ہیں اور کاہن ہیں آپ جھوٹے ہیں اور افترا پرداز ہیں حتی کہ سیدنا حضرت عمر بن خطاب (رض) نے چیدہ چیدہ باتیں جو اہل مکہ آپ (صلی اللہ علیہ وآلہ وسلم) کے خلاف کرتے تھے کہہ ڈالیں پھر آپ نے سیدنا حضرت عمر بن خطاب (رض) کو اپنی ایک طرف بیٹھنے کا حکم دیا چنانچہ سیدنا حضرت ابوبکر صدیق (رض) آپ (صلی اللہ علیہ وآلہ وسلم) کی ایک طرف بیٹھ گئے اور حضرت عمر (رض) دوسری طرف پھر آپ نے لوگوں کو بلایا اور فرمایا : کیا میں تمہیں ان دو اصحاب کی مثالیں نہ دوں ؟ صحابہ کرام رضوان اللہ تعالیٰ عنہم اجمعین نے عرض کی : جی ہاں یا رسول اللہ (صلی اللہ علیہ وآلہ وسلم) ! آپ نے چہرہ اقدس سیدنا حضرت ابوبکر صدیق (رض) کی طرف کرکے فرمایا : ابراہیم (علیہ السلام) اللہ تعالیٰ کے معاملہ میں دودھ میں پڑے گھی سے بھی زیادہ نرم تھے پھر عمر (رض) کی طرف متوجہ ہو کر فرمایا : نوح (علیہ السلام) اللہ تعالیٰ کے معاملہ میں پتھر سے بھی زیادہ سخت تھے لہٰذا معاملہ وہی طے پایا ہے جو عمر کا تجویز کردہ ہے لہٰذا تم لوگ تیاری کرو لوگ اٹھے اور سیدنا حضرت ابوبکر صدیق (رض) کے پیچھے ہو لیے اور کہنے لگے : ابوبکر (رض) ہم عمر سے نہیں پوچھتے کہ رسول اللہ (صلی اللہ علیہ وآلہ وسلم) نے آپ سے کیا سرگوشی کی ہے آپ ہمیں بتادیں سیدنا حضرت ابوبکر صدیق (رض) نے فرمایا : رسول اللہ (صلی اللہ علیہ وآلہ وسلم) نے مجھے پوچھا کہ مکہ پر چڑھائی کے بارے میں کیا کہتے ہو اور کیا رائے ہے میں نے عرض کی یا رسول اللہ (صلی اللہ علیہ وآلہ وسلم) اہل مکہ آپ کی قوم ہے (گویا میں نے نرمی برتنے کا مشورہ دیا) میں سمجھا شاید آپ میری ہی بات مان لیں گے پھر آپ نے عمر کو بلایا عمر (رض) نے کہا : اہل مکہ سر غنہ کفر ہیں حتی کہ اہل مکہ کی ہر برائی بیان کی اور کہا اللہ کی قسم عرب اس وقت تک زیر نہیں ہوں گے جب تک اہل مکہ زیر نہیں ہوتے آپ (صلی اللہ علیہ وآلہ وسلم) نے تمہیں مکہ پر چڑھائی کرنے کی تیاری کا حکم دیا ہے۔ (رواہ ابن ابی شیبۃ)