30204 ۔۔۔ ابو سلمہ اور یحییٰ بن عبدالرحمن بن حاطب روایت نقل کرتے ہیں کہ نبی کریم (صلی اللہ علیہ وآلہ وسلم) اور مشرکین کے درمیان معاہدہ تھا جبکہ بنی کعب اور بنی بکر کے درمیان مکہ میں جنگ ہوئی تھی بنی کعب کا ایک شخص فریاد رسی کے لیے رسول اللہ (صلی اللہ علیہ وآلہ وسلم) کی خدمت میں حاضر ہوا اور یہ اشعار پڑھے ۔ لا ھم انی ناشد محمدا حلف ابینا وابیہ الا تلدا فانصر ھداک اللہ نصر اعتدا وادع عباد اللہ یا توا مدادا : اے میرے پروردگار میں محمد کو وہ معاہدہ یاد دلاتا ہوں جو میرے اور ان کے باپ کے درمیان ہوا تھا اللہ تمہیں ہدایت دے ہماری زبردست مدد کیجئے اور اللہ تعالیٰ کے بندوں کو بھی مدد کے لیے بلائیں ۔ اتنے میں بادلوں کا ایک آوارہ ٹکڑا گزرا رسول اللہ (صلی اللہ علیہ وآلہ وسلم) نے اسے دیکھ کر فرمایا : بادلوں کا یہ ٹکڑا بنی کعب کی مدد کا پیغام رساں ہے پھر آپ نے حضرت عائشہ صدیقہ (رض) سے فرمایا : میری تیاری کا سامان کرو اور کسی کو مت بتاؤ تھوڑی دیر بعد سیدنا حضرت ابوبکر صدیق (رض) حضرت عائشہ صدیقہ (رض) کے پاس تشریف لائے اور انھیں متحرک دیکھ کر پوچھا : کیا وجہ ہے ؟ عرض کی : رسول اللہ (صلی اللہ علیہ وآلہ وسلم) نے مجھے تیاری کا حکم دیا ہے پوچھا : کہاں کے لیے عرض کی مکہ کے لیے (جب نبی کریم (صلی اللہ علیہ وآلہ وسلم) نے تاکیدا فرمایا تھا کہ معاملہ صیغہ راز میں رہے پھر حضرت عائشہ (رض) نے سیدنا حضرت ابوبکر صدیق (رض) کو کیوں بتادیا ؟ مطلب یہ کہ عوام الناس میں سے کسی کو نہ بتاؤ رہی بات ابوبکر وعمر یعنی خواص کی سو انھیں خود رسول اللہ (صلی اللہ علیہ وآلہ وسلم) نے بلا کر سب سے پہلے انہی سے مشورہ لیا گویا ضمنا ان کے لیے اجازت ہوگئی المختصر کہ ممانعت اوروں کے لیے تھی یہ حضرات اس سے مستثنی تھے) ابوبکر (رض) نے کہا : بخدا ! بعد ازیں ہمارے اور ان کے درمیان معاہدہ نہیں رہے گا حضرت ابوبکر (رض) رسول اللہ (صلی اللہ علیہ وآلہ وسلم) کے پاس آگئے اور ان سے تذکرہ کیا آپ نے فرمایا : اہل مکہ نے دھوکا کیا ہے اور انھوں نے معاہدہ توڑ دیا ہے پھر آپ مسلمانوں کو لے کر چل پڑے آپ راز داری میں چلے تاکہ اہل مکہ کو خبر نہ ہونے پائے ۔ ادھر ابوسفیان نے حکیم بن حزام سے کہا : بخدا ہم غفلت میں ہیں کیا تم مرا الظہران تک میرے ساتھ جاؤ گے تاکہ ہمیں کوئی خبر ملے بدیل بن ورقاء کعبی نے کہا میں بھی تمہارے ساتھ جاؤں گا ابوسفیان نے کہا اگر چاہو تو جاسکتے ہو چنانچہ یہ تینوں گھوڑوں پر سوار ہو کر چل دیئے چنانچہ اس جگہ پہنچے تاریکی پھیل چکی تھی کیا دیکھتے کہ پوری وادی میں جگہ جگہ آگ جل رہی ہے ابوسفیان نے کہا : اے حکیم ! یہ کیسی آگ ہے ؟ بدیل نے کہا : یہ بنی عمرو کی آگ ہے انھیں جنگ نے دھوکا میں ڈال دیا ہے۔ ابوسفیان نے کہا : تیرے باپ کی قسم ! بنی عمرو بہت کم تعداد میں ہیں جبکہ یہ لوگ تو کہیں زیادہ ہیں۔ اتنے میں ان تینوں کو رسول اللہ (صلی اللہ علیہ وآلہ وسلم) کے پہرہ داروں نے آن لیا اور یہ انصار کے چند لوگ تھے جبکہ پہرے کی ذمہ داری حضرت عمر بن خطاب (رض) کے سپرد تھی پہرہ دار انھیں پکڑ سیدنا حضرت عمر بن خطاب (رض) کے پاس لے آئے سیدنا حضرت عمر بن خطاب (رض) ہنس رہے تھے اور کہا : اگر تم ابوسفیان کو پکڑ لاتے کیا ہی اچھا ہوتا پہرہ داروں نے کہا : بخدا ! ہم ابو سفیان کو پکڑ لائے ہیں فرمایا : اسے اپنے پاس گرفتار رکھو صبح ہوتے ہی سیدنا حضرت عمر بن خطاب (رض) ابوسفیان کو نبی کریم (صلی اللہ علیہ وآلہ وسلم) کی خدمت میں لے آئے ابوسفیان کو بیعت کا کہا گیا یہ بولا میرے لیے بیعت کے سوا کوئی چارہ کار نہیں ورنہ میرا برا حال ہوگا ، پھر حکیم بن حزام کو بیعت کا کہا گیا چنانچہ انھوں نے بھی بیعت کرلی ، جب یہ لوگ واپس پلٹے سیدنا حضرت ابوبکر صدیق (رض) نے کہا : یا رسول اللہ (صلی اللہ علیہ وآلہ وسلم) ابوسفیان شہرت کو پسند کرتا ہے آپ اسے شہرت کی کوئی چیز دے دیں البتہ ابن خطل مقیس بن صبابہ لیثی عبداللہ بن سعد بن ابی سرح اور دو باندیوں کے لیے کوئی امن نہیں انھیں قتل کرو اگرچہ یہ کعبہ کے پردوں سے کیوں نہ لپٹے ہوں سیدنا حضرت عمر بن خطاب (رض) نے کہا : یا رسول اللہ آپ حکم دیں تاکہ ابوسفیان کو سر راہ روک لیا جائے اور وہ اسلامی لشکر کی شان و شوکت دیکھے چنانچہ عباس (رض) نے ابو سفیان کو سر راہ روک لیا اور کہا تم یہاں بیٹھو گے تاکہ مسلمانوں کو دیکھو ؟ ابوسفیان نے اثبات میں جواب دیا وہ سمجھا مٹھی بھر مسلمان ہوں گے اس لیے دیکھنے میں کیا حرج اتنے میں قبیلہ جہینہ کا رستہ گزار ابوسفیان نے کہا : اے عباس (رض) یہ کون لوگ ہیں حضرت عباس (رض) نے کہا : یہ قبیلہ جہنیہ ہے کہا : مجھے جہینیہ سے کیا غرض بخدا ان سے ہماری کبھی لڑائی نہیں ہوئی پھر مزنیہ کا دستہ گزرا اس کے متعلق پوچھا کہا : یہ مزنیہ ہے ابوسفیان بولا : میرا مزنیہ سے کیا تعلق میری ان سے کبھی لڑائی نہیں ہوئی ، پھر قبیلہ سلیم گزرا اس کے متعلق پوچھا عباس (رض) نے کہا : یہ سلیم ہے پھر فردا فردا یکے بعد دیگرے اسلامی دستے گزرتے رہے بالکل آخر میں نبی کریم (صلی اللہ علیہ وآلہ وسلم) اپنے صحابہ کرام رضوان اللہ تعالیٰ عنہم اجمعین کے ساتھ مہاجرین و انصار کے دستے میں گزرے ابوسفیان نے پوچھا : اے عباس یہ کون لوگ ہیں ؟: کہا یہ رسول اللہ (صلی اللہ علیہ وآلہ وسلم) ہیں مہاجرین و انصار کے ساتھ ابوسفیان بولا : تمہارا بھتیجا عظیم بادشاہ بن گیا ہے عباس (رض) نے کہا : نہیں بلکہ یہ نبوت کی شان و شوکت ہے مسلمانوں کی تعداد 10، 12 ہزار کے لگ بھگ تھی ۔ ابوسفیان واپس مکہ لوٹ گیا : نبی کریم (صلی اللہ علیہ وآلہ وسلم) نے جھنڈا حضرت سعد بن عبادہ (رض) کو دیا ہوا تھا پھر سعد (رض) نے جھنڈا اپنے بیٹے حضرت قیس بن سعد (رض) کو دے دیا پھر ابوسفیان گھوڑے پر سوار ہو کر آگے نکل گیا حتی کہ ثنیہ میں جا پہنچا اہل مکہ نے پوچھا : تمہارے پیچھے کیا حال ہے کہا میرے پیچھے مسلمانوں کا سیل رواں ہے ایسا شوکت والا لشکر میں نے کبھی نہیں دیکھا ، جو شخص میرے گھر میں داخل ہوگا وہ امن میں رہے گا پھر لوگوں کا ہجوم ابوسفیان کے گھر پر امنڈ آیا پھر رسول اللہ (صلی اللہ علیہ وآلہ وسلم) تشریف لائے اور مقام جحون پر آکر رکے مقام جحون کے اوپر کی طرف ہے آپ نے حضرت زبیر (رض) کو شہ سواروں کے دستے پر امیر مقرر کرکے مکہ کی بالائی طرف سے روانہ کیے جبکہ حضرت خالد بن ولید کو مکہ کے زیریں حصہ سے روانہ کیا پھر نبی کریم (صلی اللہ علیہ وآلہ وسلم) نے مکہ کو مخاطب کرکے فرمایا : اے مکہ ! تو اللہ تعالیٰ کی زمین کا سب سے اعلی و افضل حصہ ہے ، بخدا ! اگر مجھے یہاں سے نہ نکالا جاتا میں کبھی نہ نکلتا مجھ سے قبل مکہ کسی کے لیے حلال نہیں ہو اور میرے بعد بھی کسی کے لیے حلال نہیں ہوگا میرے لیے دن میں گھڑی بھر کے لیے حلال ہوا ہے مکہ قابل حرمت ہے اس کے درخت نہ کاٹے جائیں اس کی گھاس نہ کاٹی جائے اس کا لقطہ نہ اٹھایا جائے البتہ اعلان کرنے والا اٹھاسکتا ہے ، ابو شاہ نامی ایک شخص نے کہا جبکہ بعض محدثین نے حضرت عباس (رض) کا قول کیا ہے کہ انھوں نے کہا : یا رسول اللہ اس حکم سے اذخر گھاس مستثنی ہے چونکہ اذخر گھاس ہمارے گھروں اور لوہاروں کے کام آتا ہے۔ رہی بات ابن خطل کی تو صحابہ کرام رضوان اللہ تعالیٰ عنہم اجمعین نے اسے کعبہ کے پردوں کے ساتھ چمٹا ہوا پایا اور وہیں قتل کردیا گیا جبکہ مقیس بن صبابہ کو صحابہ کرام رضوان اللہ تعالیٰ عنہم اجمعین نے صفا اور مروہ کے درمیان پایا بنی کعب کے چند لوگ اسے قتل کرنے کے لیے آگے بڑھے اس کے چچا زاد بھائی نمیلہ نے کہا : اس کا راستہ چھوڑ دو بخدا ! جو بھی اس کے قریب آئے گا میں اس کا سر قلم کر دوں گا آگے بڑھنے والے چوک گئے اور پیچھے ہٹ گئے پھر خود ہی نمیلہ نے مقیس پر تلوار سے حملہ کردیا اور تلوار سر پردے ماری جس سے اس کا سرکٹ گیا اور مقیس ٹھنڈا ہو کر زمین پر گرگیا نمیلہ نے ایسا اس لیے کیا تاکہ اس کے قتل پر کوئی اور فخر نہ کرسکے پھر رسول اللہ (صلی اللہ علیہ وآلہ وسلم) نے بیت اللہ کا طواف کیا اتنے میں عثمان بن طلحہ داخل ہوا آپ نے فرمایا : اے عثمان ! کہاں ہے بیت اللہ کی چابی ؟ کہا وہ میری ماں سلامہ بنت سعد کے پاس ہے رسول اللہ (صلی اللہ علیہ وآلہ وسلم) نے سلامہ کے پاس آدمی بھیجا سلامہ نے کہا : لات اور عزی کی قسم میں کبھی بھی چابی نہیں دوں گی عثمان نے ماں سے کہا : بخدا معاملہ بدل چکا ہے اگر تو چابی نہیں دے گی مجھے اور میرے بھائی کو قتل کردیا جائے گا پھر عثمان چابی لے کر چلا جب رسول اللہ (صلی اللہ علیہ وآلہ وسلم) کے پاس پہنچا ، چابی نیچے گرگئی اور اس پر کپڑا ڈال دیا اور پھر بیت اللہ کا دروازہ کھولا آپ بیت اللہ میں داخل ہوئے اور اس کے چاروں کونوں میں تکبیر کہی اور اللہ تعالیٰ کی حمد کی پھر دونوں ستونوں کے درمیان دو رکعت نماز پڑھی ، پھر آپ باہر تشریف لے گئے اور لوگوں کے درمیان کھڑے ہوئے سیدنا حضرت علی المرتضی (رض) نے کہا : مجھے امید ہوئی کہ رسول اللہ (صلی اللہ علیہ وآلہ وسلم) چابی مجھے عطا کریں گے یوں اس طرح سقایت اور حجابت (یعنی حاجیوں کو پانی پلانے کا شرف اور دربانی) کا شرف ہمیں مل جائے گا تاہم رسول اللہ (صلی اللہ علیہ وآلہ وسلم) نے فرمایا : کہاں ہے عثمان ؟ جو شرف اللہ تعالیٰ نے تمہیں عطا کیا ہے میں اسے باقی رکھنا چاہتا ہوں یہ لو چابی ۔ پھر بلال (رض) کعبہ کی چھت پر چڑھے اور اذان دی خالد بن اسیر نے انھیں دیکھ کر کہا : یہ کیسی آواز ہے لوگوں نے کہا۔ یہ بلال بن رباح ہے خالد نے کہا : ابوبکر کا حبشی غلام لوگوں نے کہا : جی ہاں کہا یہ کیا کہہ رہا ہے ؟ لوگوں نے کہا یہ کہتا ہے : (اشھدان الا الہ الا اللہ واشھدان محمد رسول اللہ) کہنے لگا : اللہ تبارک وتعالیٰ نے خالد کے باپ اسیر کو یہ آواز نہیں سننے دی اسیر جنگ بدر میں مشرک قتل کردیا گیا۔ مکہ فتح کرنے کے بعد نبی کریم (صلی اللہ علیہ وآلہ وسلم) حنین تشریف لے گئے جب کہ آپ کے مقابلہ کے لیے ھوازن نے اپنے انڈے بچے جمع کر رکھے تھے وہاں پہنچنے پر جنگ چھڑ گئی مسلمانوں کو عارضی شکست ہوئی اس پر اللہ تبارک وتعالیٰ نے یہ آیت نازل فرمائی (ویوم حنین اذا اعجبتکم کثرتکم فلم تغن عنکم شیئا) اور غزوہ حنین کے دن جب تمہیں تمہارے کثرت نے عجب میں ڈال دیا تھا جب کہ تمہاری کثرت تمہارے کچھ کام نہ آسکی پڑھ نبی کریم (صلی اللہ علیہ وآلہ وسلم) اپنی سواری سے نیچے اترے اور کہا : اللہ تبارک وتعالیٰ اگر تو چاہے تو سطح زمین پر تیری عبادت نہیں ہوگی ۔ پھر فرمایا : شاھت الوجوہ چہرے قبیح ہوجائیں پھر مٹھی بھر کنکریاں دشمن کی طرف پھینکیں کنکریاں پھینکنی تھیں کہ دشمن الٹے پاؤں بھاگ گیا نبی کریم (صلی اللہ علیہ وآلہ وسلم) نے قیدیوں اور ان کے اموال پر قبضہ کرلیا پھر قیدیوں سے کہا : اگر چاہو تو قید میں رہو چاہو تو فدیہ دے کر جان چھڑا لو اہل حنین نے کہا : آج کے دن ہم خاندانی شرافت کو ترجیح دیں گے نبی کریم (صلی اللہ علیہ وآلہ وسلم) نے فرمایا : اچھا جب میں جاؤں تو مجھ سے سوال کرنا میرے پاس جو کچھ ہوا میں تمہیں دوں گا البتہ مسلمانوں میں سے کسی کو مشکل نہ پیش آئے جو کچھ میں نے تمہیں دیا ہے اسی کی مثل مسلمانوں نے کہا ہے سوائے عینیہ بن حصن کے اس نے کہا ہے کہ جو میرے لیے ہے وہ میں اسے نہیں دوں گا فرمایا : تو حق پر ہے چنانچہ اس دن اس کے حصہ میں ایک بڑھیا آئی اور وہ بھی نابینا۔ پھر نبی کریم (صلی اللہ علیہ وآلہ وسلم) نے اہل طائف کا محاصرہ کرلیا اور یہ محاصرہ ایک مہینہ تک رہا اس دوران سیدنا حضرت عمر بن خطاب (رض) نے عرض کی نبی کریم (صلی اللہ علیہ وآلہ وسلم) آپ مجھے اہل طائف کے ہاں بھیجیں میں انھیں دعوت دوں گا فرمایا اہل طائف تو تمہیں قتل کردیں گے چنانچہ عزوہ اہل طائف کے پاس گئے اور انھیں دعوت الی اللہ دی انھیں ایک مشرک نے تیر مارا اور انھیں قتل کردیا نبی کریم (صلی اللہ علیہ وآلہ وسلم) نے عروہ کے متعلق فرمایا : اس کی مثال اس شخص جیسی ہے جس کا واقعہ سورت یس میں بیان ہوا ہے پھر نبی کریم (صلی اللہ علیہ وآلہ وسلم) نے یہ حکم دیا کہ اہل طائف کے مال مویشی پکڑ لو تاکہ انھیں سخت حالات کا مقابلہ کرنا پڑے۔ مہر نبوت کا دیدار : پھر جب نبی کریم (صلی اللہ علیہ وآلہ وسلم) واپس ہوئے اور مقام نخلہ پر پہنچے تو لوگوں نے آپ سے مال مانگنا شروع کردیا حضرت انس (رض) کہتے ہیں لوگوں نے اس قدر ہمجوم کردیا حتی کہ آپ کی کمر سے چادر بھی چھین لی اور اس کی پاداش میں مہر نبوت سامنے ہوگئی یوں دکھائی دی جیسے چاند کا ٹکڑا ہوا نبی کریم (صلی اللہ علیہ وآلہ وسلم) نے ازروئے ظرافت فرمایا : تمہارا باپ نہ رہے میری چادر مجھے واپس کرو کای تم مجھے بخیل سمجھتے ہو بخدا اگر میرے پاس اونٹ اور بکریاں ہوتیں جن سے ان دونوں پہاڑیوں کا درمیانی علاقہ بھرا پڑا ہوتا میں وہ بھی تمہیں دے دیتا اس دن آپ نے تالیف قلب کے طور پر لوگوں کو ایک ایک سو اونٹ تک عطا کیے اس موقع پر انصار نے کہا : کہ ہمیں کچھ نہ ملے نبی کریم (صلی اللہ علیہ وآلہ وسلم) نے انصار کو اپنے پاس بلایا اور فرمایا میں نے سنا ہے کہ تم ایسی ایسی باتیں کرتے ہو کیا میں نے تمہیں گمراہ نہیں پایا پھر اللہ تبارک وتعالیٰ نے میری وجہ سے تمہیں ہدایت دی ؟ انصار نے کہا جی ہاں کیا میں نے تمہیں آپس میں دشمن نہیں پایا پھر اللہ تبارک وتعالیٰ نے تمہارے دلوں میں محبت ڈال دی ؟ انصار نے کہا : جی ہاں اگر تم کہلنا چاہو تو کہہ سکتے ہو کہ آپ بھی تو بےیارو مددگار آئے اور ہم نے آپ کی مدد کی ؟ انصار نے کہا : اللہ اور اس کا رسول بہترین اجر دینے والے ہیں اگر تم کہنا چاہو تو کہہ سکتے ہو کہ آپ بےگھر آئے ہم نے آپ کو ٹھکانا دیا ؟ انصار نے کہا اللہ اور اس کا نبی کریم (صلی اللہ علیہ وآلہ وسلم) اس کا بہتر صلہ دینے والے ہیں اگر تم چاہو تو کہہ سکتے ہو کہ آپ کسمپرسی کے عالم میں آئے ہم نے آپ کی غمخواری کی ؟ انصار نے کہا : اللہ اور اس کا رسول بہتر صلہ دینے والے ہیں فرمایا : کیا تم اس پر راضی نہیں ہو کہ لوگ بکریاں اور اونٹ لے کر جائیں اور تم اللہ کے رسول کو اپنے گھروں میں لے کر جاؤ؟ انصار نے عرض کی : جی ہاں : نبی کریم (صلی اللہ علیہ وآلہ وسلم) نے فرمایا : لوگ عام ہیں اور تم خاص ہو۔ آپ (صلی اللہ علیہ وآلہ وسلم) نے غنائم پر بنی عبدالاشہل کے بھائی عباد بن رقش کو ذمہ دار بنایا تھا قبیلہ اسلم کا ایک شخص ننگا آیا اس کے پاس کوئی کپڑا نہیں تھا کہنے لگا : ان چادروں سے مجھے ایک چادر پہنا دو عباد (رض) نے کہا : نہیں یہ غنائم مسلمانوں کی ہیں میرے لیے حلال نہیں کہ ان سے تمہیں کچھ دوں ؟ اس شخص کی قوم نے کہا : ایک چادر اسے دے دو اگر کسی نے کوئی بات کی تو یہ مال ہمارا ہے اور اہمارا دیا ہوا ہے چنانچہ عباد (رض) نے اسے ایک چادر دے دی پھر نبی کریم (صلی اللہ علیہ وآلہ وسلم) کو خبر ہوئی آپ نے فرمایا : مجھے اس کا کوئی خدشہ نہیں کہ تم نے خیانت کی ہے عباد (رض) نے عرض کی : نبی کریم (صلی اللہ علیہ وآلہ وسلم) ! میں نے اسے چادر نہیں اسے چادر نہیں دی حتی کہ اس کی قوم نے کہا : اگر کسی نے کوئی بات کی تو یہ ہمارا مال ہے اور ہمارا دیا ہوا آپ نے تین بار فرمایا : جزاکم اللہ خیرا۔ (رواہ ابن ابی شیبۃ)