30258 ۔۔۔ ” مسند حضرت انس بن مالک (رض) “ ، حضرت انس بن مالک (رض) روایت کی ہے کہ انصار کے ستر سے زائد افراد ایسے تھے کہ جب رات چھا جاتی وہ مدینہ میں کسی معلم کے پاس آجاتے وہیں رات بسر کرتے اور قرآن مجید پڑھتے تھے صبح ہوتی اور جس کے پاس کچھ ہوتا کھا لیتا اور پانی پی لیتا اور جن کے پاس زیادہ خرچ کرنے کی وسعت ہوتی وہ بکری ذبح کرلیتے اور رسول اللہ (صلی اللہ علیہ وآلہ وسلم) کے حجرے کے سامنے لٹکا دیتے جب حضرت خبیب (رض) پر مصیبت نازل ہوئی تو انصار کے ان آدمیوں کو رسول اللہ (صلی اللہ علیہ وآلہ وسلم) نے روانہ کیا ان میں میرے ماموں حرام (رض) بھی تھے چنانچہ یہ لوگ بنی سلیم کی ایک بستی میں آئے ، حرام (رض) نے اپنے امیر سے کہا : کیا ہم اس بستی والوں کو خبر نہ کردیں کہ ہم ان پر حملہ کرنے نہیں آئے تاکہ جنگ کا خیال ان کے دلوں سے نکل جائے ؟ چنانچہ حرام (رض) بستی والوں کے پاس آئے اور انھیں یہ بات کہی تاہم ایک شخص نے حرام (رض) کو پیٹ میں تیر مارا تیر لگتے ہی حرام (رض) کے منہ سے نکلا : اللہ اکبر فزت برب الکعبۃ ‘: اللہ اکبر رب کعبہ کی قسم میں کامیاب ہوگیا چنانچہ مسلمان ان لوگوں کا انتظار کرتے رہے تاہم کوئی خبر دینے والا بھی باقی نہ رہا ۔ ان لوگوں کی شہادت پر رسول اللہ (صلی اللہ علیہ وآلہ وسلم) کو از حد دکھ اور رنج ہوا میں نے نبی کریم (صلی اللہ علیہ وآلہ وسلم) کو دیکھا کہ آپ ہر روز صبح کی نماز میں ہاتھ اٹھا کر بنی سلیم کے لیے بددعا کرتے رہے کچھ عرصہ بعد ابو طلحہ (رض) آپ (صلی اللہ علیہ وآلہ وسلم) کی خدمت میں حاضر ہوئے آپ نے فرمایا : کیا تمہیں حرام کے قاتل کا کوئی علم ہے ؟ اللہ اسے غارت کرے ابو طلحہ (رض) نے عرض کی : یا رسول اللہ ! ایسا نہ فرمائیں حرام (رض) کا قاتل مسلمان ہوچکا ہے۔ (رواہ الطبرانی وابو عوانۃ)