3026: بنی عامر کے ایک شخص نے حضور (صلی اللہ علیہ وآلہ وسلم) سے بہت سے سوالات کیے پھر عرض کیا : کیا علم کی کوئی ایسی شے باقی ہے یا رسول اللہ ! جس کا آپ کو بھی علم نہیں ہے ؟ تب رسول اکرم (صلی اللہ علیہ وآلہ وسلم) نے ذیل کا فرمان ارشاد فرمایا :
ان اللہ عندہ علم الساعۃ وینزل الغیث ویعلم ما فی الارحام وما تدری نفس ما ذا تکسب غدا وما تدری نفس بای ارض تموت ان اللہ علیم خبیر۔ لقمان ۔ آخری آیت۔
خدا ہی کو قیامت کا علم ہے اور وہی مینہ برساتا ہے اور وہی (حاملہ کے) پیٹ کی چیزوں کو جانتا ہے (کہ نر ہے یا مادہ) اور کوئی شخص نہیں جانتا کہ وہ کل کیا کام کرے گا اور کوئی متنفس نہیں جانتا کہ کس سرزمین میں اسے موت آئے گی بیشک خدا ہی جاننے والا (اور) خبردار ہے۔ (مسند احمد، عن رجل من بنی عامر)