30271 ۔۔۔ حضرت عبداللہ بن عباس (رض) روایت کی ہے کہ رسول کریم (صلی اللہ علیہ وآلہ وسلم) نے اسامہ کا لشکر روانہ کیا لیکن رسول اللہ (صلی اللہ علیہ وآلہ وسلم) کی مرض الوفات کی وجہ سے لشکر جرف سے آگے نہ جاسکا نیز مسیلمہ کذاب اور اسود عنسی نے بھی اپنی جھوٹی نبوت کا ڈھونگ رچا رکھا تھا بعض لوگ اسامہ (رض) کی امارت پر بھی تنقید کر رہے تھے حتی کہ بیماری میں رسول اللہ (صلی اللہ علیہ وآلہ وسلم) کو خبر ہوئی تو آپ گھر سے باہر تشریف لائے آپ نے سر درد کی وجہ سے سر مبارک پر پٹی باندھ رکھی تھی آپ نے فرمایا : میں نے عائشہ (رض) کے گھر میں خواب دیکھا ہے میں دیکھتاہوں کہ میرے بازوؤں میں سونے کے دو کنگن ہیں میں نے انھیں سخت ناپسند کیا اور پھینک دیئے میں نے ان کی تعبیر ان دو کذابوں سے لی ہے یعنی صاحب یمامہ اور صاحب یمن میں نے سنا ہے کہ کچھ لوگ اسامہ کی امارت پر تقید کر رہے ہیں بخدا قبل ازیں لوگ اس کے باپ کی امارت پر بھی تنقید کرچکے ہیں بلاشبہ اس کا باپ امارت کا سزاوار تھا اور اسامہ بھی امارت کا سزوار ہے لہٰذا اسامہ کے لشکر کو چلتا کرو پھر فرمایا : اللہ تعالیٰ ان لوگوں پر لعنت کرے جنہوں نے انبیاء کی قبروں کو سجدہ گاہ بنا لیا چنانچہ اسامہ (رض) نے مدینہ سے نکل کر مقام جرف میں پڑاؤ ڈال لیا اسی اثناء میں رسول اللہ (صلی اللہ علیہ وآلہ وسلم) کے مرض میں شدت آگئی آپ (صلی اللہ علیہ وآلہ وسلم) کی صحت یابی کے انتظار میں رہے کہ اللہ تعالیٰ نے آپ کو اپنے پاس بلا لیا ۔ (رواہ سیف و ابن عساکر)