30289 ۔۔۔ حضرت عبداللہ بن عمرو (رض) روایت کی ہے کہ نبی کریم (صلی اللہ علیہ وآلہ وسلم) نے حضرت عبدالرحمن بن عوف (رض) کو اپنے پاس بلایا اور حکم دیا کہ تیاری کرو میں تمہیں آج ہی ایک سریہ کے ساتھ بھیج رہا ہوں یا فرمایا کل انشاء اللہ بھیجوں گا ، حضرت عبداللہ بن عمرو (رض) کہتے ہیں میں نے جب یہ فرمان سنا میں نے کہا : میں صبح ضرور نبی کریم (صلی اللہ علیہ وآلہ وسلم) کے ساتھ مسجد میں داخل ہوں گا اور آپ کے ساتھ نماز پڑھوں گا تاکہ حضرت عبدالرحمن بن عوف (رض) کو کی گئی وصیت سن سکوں چنانچہ میں مسجد میں بیٹھا رہا پھر نماز پڑھی جب نماز سے فارغ ہوا دیکھا کہ سیدنا حضرت ابوبکر صدیق (رض) ، سیدنا حضرت عمر بن خطاب (رض) حضرت عبدالرحمن بن عوف (رض) اور کچھ دیگر لوگ کھڑے ہیں اور رسول اللہ (صلی اللہ علیہ وآلہ وسلم) حکم دے رہے ہیں کہ تم لوگ آج رات ہی دومتہ الجندل کی طرف کوچ کر جاؤ اور وہاں کے لوگوں کو اسلام کی دعوت دو چنانچہ دوسرے لوگ چلے گئے لیکن حضرت عبدالرحمن بن عوف (رض) پیچھے رہ گئے نبی کریم (صلی اللہ علیہ وآلہ وسلم) نے ان سے پیچھے رہ جانے کی وجہ دریافت کی ابن عمر (رض) کہتے ہیں حضرت عبدالرحمن بن عوف (رض) کے ساتھی سحری کے وقت کوچ کر گئے تھے اور مقام جرف میں جا ٹھہرے تھے ، ان کی تعداد سات سو تھی حضرت عبدالرحمن بن عوف (رض) نے عرض کیا : یا رسول اللہ (صلی اللہ علیہ وآلہ وسلم) میں چاہتا ہوں سفر پر رورانہ ہوتے وقت میری آخری ملاقات آپ سے ہو حضرت عبدالرحمن بن عوف (رض) نے سر پر عمامہ پہن رکھا تھا آپ (صلی اللہ علیہ وآلہ وسلم) نے حضرت عبدالرحمن بن عوف (رض) کو اپنے سامنے بٹھایا اور اپنے دست اقدس سے ان کا عماملہ کھولا پھر سیاہ عمامہ باندھا اور اس کا شملہ دونوں کاندھوں کے درمیان رکھا پھر فرمایا : اے ابن عوف یوں عمامہ باندھنا چاہے حضرت عبدالرحمن بن عوف (رض) نے اپنے بدن پر تلوار لٹکا رکھی تھی پھر نبی کریم (صلی اللہ علیہ وآلہ وسلم) نے فرمایا : اللہ تعالیٰ کا نام لے کر جہاد فی سبیل اللہ کے لیے روانہ ہوجاؤ جو بھی اللہ تعالیٰ کا انکار کرے اس سے قتال کرو مال غنیمت میں خیانت نہیں کرنی کسی سے دھوکا نہیں کرنا اور بچوں کو قتل نہیں کرنا ، حضرت عبدالرحمن بن عوف (رض) رخصت ہو کر چل پڑے اور اپنے ساتھیوں سے جا ملے پھر لشکر لے کر دومتہ الجندل جا پہنچے جب مطلوبہ بستی میں داخل ہوئے تو وہاں کے لوگوں کو اسلام کی دعوت دی چنانچہ تین دن تک انھیں اسلام کی دعوت دیتے رہے تاہم پہلے اور دوسرے دن ان لوگوں نے اسلام سے انکار کیا اور جنگ کا عندیہ دیا البتہ تیسرے دن اصبغ بن عموہ کلبی نے اسلام قبول کرلیا یہ نصرانی تھا اور اپنے قبیلے کا سردار تھا حضرت عبدالرحمن بن عوف (رض) نے اطلاع کے لیے خط لکھ کر رافع بن مکیث کو بھیجا اور خط میں رسول اللہ (صلی اللہ علیہ وآلہ وسلم) کو لکھا کہ میں ان لوگوں میں شادی کرنا چاہتا ہوں نبی کریم (صلی اللہ علیہ وآلہ وسلم) نے جوابا لکھا بلکہ اصبغ کی بیٹی تماضر سے شادی کرو چنانچہ عبدالرحمن (رض) نے تماضر سے شادی کرلی اور یہیں زفاف ہوئی پھر اسے لے کر واپس لوٹے اور اسی عورت کے بطن سے سلمہ بن عبدالرحمن مشہور تابعی پیدا ہوئے ۔ (رواہ الدارقطنی فی الافراد وابن عساکر)