30325 ۔۔۔ سیدنا حضرت علی المرتضی (رض) روایت کی ہے کہ قبیلہ نہد کا ایک وفد رسول اللہ (صلی اللہ علیہ وآلہ وسلم) کی خدمت میں حاضر ہوا وفد میں طھفہ بن زہیر بھی تھا اس نے وفد کی نمائندگی کرتے ہوئے ان الفاظ میں تقریر کی یا رسول اللہ ! ہم سرزمین تہام کے زیریں حصہ سے آئے ہیں اور میس کے بنے ہوئے کجاؤں پر سوار ہو کر آئے ہیں اور پہاڑی بکرے ہمارے اوپر کودتے رہے ہم موسلادہار بارش کے متلاشی ہیں چونکہ زمین سے اگنے والی نباتات ختم ہوچکی ہیں ، پیلو کے درخت ختم ہوچکے (چلو ہم ان کے پھل کھا کر گزارا کرلیتے تھے) اگر آسمان پر بادلوں کا کوئی آوارہ ٹکڑا دکھائی دیتا ہے ہم بوچھاڑ کی آس لگا بیٹھے ہیں مگر بادلوں کا وہ آوارہ ٹکڑا بانجھ نکلتا ہے ہمیں دور دراز علاقوں میں پانی کی بوند بوند کے لیے گھومنا پڑتا ہے جہاں ہر طرف ہلاکت منہ کو لے کھڑی ہوتی ہے ہم کوئی نشیب و فراز نہیں چھوڑتے جہاں پانی کی تلاش میں گھومتے نہ ہوں مگر وائے رہے ناکامی بوندیں بھی خشک ہوگئیں مضافات پانی سے خالی ہوگئے نباتات اور جڑی بوٹیوں کی جڑیں بھی خشک ہوچکی ہیں جو اونٹ فربہ تھے ان کی فربہی جاتی رہی قحط کی وجہ سے ٹہنیوں کی طراوت ختم ہوگئی گویا اونٹ ہلاک ہوگئے اور باغات سوکھ گئے یا رسول اللہ (صلی اللہ علیہ وآلہ وسلم) ہم بتوں اور ان کی عبادت سے بیزار ہوچکے ہیں دہریت کا عقیدہ ختم کردیا ہے اب ہم مسلمانوں کی دعوت میں داخل ہونا چاہتے ہیں اور شریعت اسلام کو اپنا اوڑھنا بچھونا بنانا چاہتے ہیں جب تک سمندر کی موجوں میں تلاطم ہے اور جب تک نعار پہاڑ قائم ہے ہمارے چوپائے شبان کے بغیر گھوم رہے ہیں اونٹنیوں کے تھنوں میں دودھ نام کی کوئی چیز نہیں حتی کہ ایک قطرہ بھی ان کے تھنوں سے نہیں ٹپکنے پاتا ہماری بکریاں کوسوں دور بھٹکتی پھرتی ہیں مگر ان کے چرنے کے لیے سبزہ نام کی کوئی چیز نہیں ان کے تھن قحط زدہ ہوچکے ہیں قحط سالی نے ہمارا برا حال کردیا ہے قحط کی وجہ سے ہمیں پہلے پینا ملتا ہے نہ بعد میں ۔ رسول اللہ کریم (صلی اللہ علیہ وآلہ وسلم) نے طھفہ کی تقریر سن کر فرمایا : یا اللہ انھیں بنی نہد کے خالص دودھ میں برکت عطا فرما ان کے بلوئے جانے والے دودھ دہی لسی اور پیمانے میں بھی برکت عطا فرما اور ان کی زمینوں کو سرسبز اور شاداب بنا دے اور ان کے درختوں کو پھلوں سے بھر دے ان کے تھوڑے پانی کو زیادہ کر دے یا اللہ ان کی اولاد میں سے جو مؤمن ہو اور نماز پڑھتا ہو اسے برکت عطا فرما جو زکوۃ ادا کرتا ہو اسے بھی برکت عطا فرما ۔ پھر آپ نے خط لکھا جس کا مضمون یہ تھا : بسم اللہ الرحمن الرحیم محمد اللہ کے رسول (صلی اللہ علیہ وآلہ وسلم) کی طرف سے بنی نہد کی جانب السلام علیکم ، جو نماز قائم کرتا ہو وہ مسلمان ہے جو زکوۃ ادا کرتا ہو وہ مسلمان ہے جو لا الہ الا اللہ کا اقرار کرتا ہو وہ غافل نہیں ہے تمہارے اوپر زکوۃ فرض ہے اور زکوۃ میں ہم ردی مال نہیں لیتے (جس طرح بڑھایا مال نہیں لیتے) لاغر اور عمدہ مال تمہارا ہے ہم اسے نہیں لیں گے سواری کے جانور جانوروں کے بچے اور جس گھوڑے کی سواری مشکل ہو وہ سب زکوۃ سے فارغ ہیں تمہارے جانوروں کو چراگاہوں سے نہیں روکا جائے گا اور تمہارے غیر مشمر اشجار نہیں کاٹے جائیں گے ہم زکوۃ میں دودھ دینے والے جانور بھی نہیں لیں گے جب تک تم حمیت کے طور پر انھیں متروک نہ کر دو یہ عہد اس وقت تک برقرار رہے گا جب تک تم اسلام سے پھرگئے پھر تمہارے اوپر وہی ذمہ داریاں عائد ہوں گی جو کفر پر عائد ہوتی ہیں۔ (رواہ الجوزی فی الواھیات وقال لا یصح وفیہ مجھولون وضعفاء) ۔ کلام : ۔۔۔ حدیث ضعیف ہے دیکھئے المتناھیۃ 284 ۔