3040: سورة الشوری : اے عچمان تم سے پہلے کسی نے مجھ سے یہ سوال نہیں کیا۔ (حضرت عثمان (رض) نے نبی اکرم (صلی اللہ علیہ وآلہ وسلم) سے دریافت کیا تھا کہ لہ مقالید السموات والارض، الشوری : 12) آسمانوں اور زمین کی کنجیاں اسی کے ہاتھ میں ہیں اس کی کیا تفسیر ہے ؟ چنانچہ آپ (صلی اللہ علیہ وآلہ وسلم) نے فرمایا اس کی تفسیر لا الہ الا اللہ واللہ اکبر سبحان اللہ وبحمدہ استغفر اللہ ولا حول ولا قوۃ الا باللہ الاول والاخر والظاہر والباطن بیدہ الخیر یحییٰ ویمیت وھو علی کل شیء قدیر۔ (ہے یعنی آسمانوں اور زمین کی کنجیاں یہی ہیں) اے عثمان ! صبح و شام جس شخص نے یہ کلمات دس دس مرتبہ کہہ لیے اللہ پاک اس کو چھ خصلتیں عطا فرمائے گا۔ پہلی یہ کہ ابلیس اور اس کے لشکر سے اس کی حفاظت فرمائے گا۔ دوسری ایک قنطار اس کو اجر مرحمت فرمائے گا (یعنی ہزار اوقیہ) تیسری خصلت یہ کہ جنت میں اس کا درجہ بڑھا دیا جائے گا۔ چوتھی یہ کہ حور عین سے اس کی شادی کروا دی جائے گی۔ پانچویں یہ کہ موت کے وقت بارہ ہزار فرشتے اس کے استقبال کے لیے حاضر ہوں گے۔ چھٹی خصلت یہ کہ اللہ پاک اس کو اتنا اجر عطا فرمائیں گے گویا اس نے قرآن، توراۃ ، انجیل اور زبور سب کی مکمل تلاوت کرلی۔ اس کے ساتھ ساتھ اس کو حج اور عمرہ کا ثواب ملے گا ایسے حج وعمرہ کا جو بارگاہ خدا میں قبول کرلیے گئے ہوں۔ پس اگر وہ اس دن مرا تو شہداء کے زمرے میں اٹھایا جائے گا۔ (یوسف القاضی فی سننہ، مسند ابی یعلی، الضعفاء للعقیلی، ابن ابی لیلۃ، ابن مردویہ نسائی فی الاسماء بروایت عثمان (رض)
کلام : مصنف فرماتے ہیں علامہ ابن الجوزی (رح) نے اس روایت کو موضوع روایات میں شمار کیا ہے۔ اور یہ غیر تسلیم شدہ امر ہے۔