30617 ۔۔۔ عبدالرحمن بن ابی الزناد کہتے ہیں کہ ابوالزنا د نے یہ رسالہ خارجہ بن زید بن ثابت (رض) سے لیا وہ زید کے خاندان میں بڑے تھے۔ بسم اللہ الرحمن الرحیم : لعبداللہ معاویہ امیرالمومنین ۔ من زید بن ثابت فذکر الرسالة بطولھا فیھا۔
اس رسالہ میں مذکور ہے کہ میں نے امیر المومنین عمر بن خطاب (رض) کے اس فیصلہ کو دیکھا جس میں انھوں نے دادا کو بھائی فرض کر کے میراث تقسیم فرمائی جب دادا ایک بھائی کے ساتھ آیا تو مال کو دونوں میں آدھا آدھا تقسیم فرمایا اور اگر دادا ایک بہن کے ساتھ آیا تو بہن کو ثلث دیا اگر دو بہنیں ہوں تو نصف دادا کو اور نصف دونوں بہنوں کو دیا اگر دادا اور دو بھائی ہوں تو دادا کو ثلث دیا اگر بھائیوں کی تعداد زیادہ ہو تو میں نے نہیں دیکھا کہ دادا کا حصہ ثلث سے کم کیا ہو دادا کو ثلث دینے کے بعد جو مال باقی بچا وہ بھائیوں کے لیے ہے کیونکہ حقیقی بھائی بہنیں ایک دوسرے سے اولی ہیں اس لیے کہ اللہ تعالیٰ نے ان کے لیے میراث کے حصے مقرر فرمائے نہ علاتی بہن بھائیوں کے لیے اسی وجہ سے میرا خیال یہ ہے کہ امیر المومنین عمر (رض) دادا اور علاتی بھائیوں میں مقاسمہ فرماتے تھے اور اخیافی بھائیوں کو دادا کی موجودگی میں کچھ نہیں عطاء فرماتے تھے اور کہا کہ میرا خیال یہ ہے کہ حضرت عثمان غنی (رض) بھی حضرت عمر (رض) کا فیصلہ جو میں آپ کی طرف لکھا اسی کے مطابق فیصلہ فرماتے تھے ۔ (رواہ بیہقی)