3290: اللہ پاک قیامت کے دمن مومن کو بلائیں گے حتی کہ اس کو اپنے سامنے کھڑا کریں گے اور فرمائیں گے۔ اے بندے ! میں تجھے حکم دیا تھا کہ مجھ سے مانگ میں قبول کروں گا تو کیا تو نے مجھ سے دعا کی تھی ؟ بندہ عرض کرے گا : ہاں میرے رب ! پروردگار فرمائیں گے۔ تو نے مجھ سے کوئی دعا نہیں کی مگر میں نے وہ قبول کرلی تھی۔ کیا فلاں دن تو نے مجھ سے یہ یہ دعا نہیں کی تھی اس مصیبت پر جو تجھے پیش آئی تھی ؟ کہ میں وہ مصیبت تجھ سے ہٹا دوں۔ چنانچہ میں وہ مصیبت تجھ سے دفع کردی تھی ؟ بندہ عرض کرے گا : بیشک پروردگار ! (ایسا ہی ہوا تھا) پروردگار فرمائیں گے۔ یہ تو میں نے جلد دنیا میں ہی قبول کرلی تھی۔ لیکن ایک دن تو نے مجھ سے یہ یہ دعا کی تھی اس مصیبت کے لیے جو تجھ پر نازل ہوئی تھی کہ میں اس میں کوئی کشادگی پیدا کردوں مگر تو نے کوئی آسانی اور کشادگی نہیں دیکھی ؟ بندہ عرض کرے گا بیشک اے پروردگار ! پروردگار فرمائیں گے : میں نے اس کے بدلہ جنت میں تیرے لیے یہ ذخیرہ کردیا ہے۔ اسی طرح تو نے مجھ سے ایک ضرور پوری کرنے کا سوال کیا تھا فلاں فلاں دن لیکن تو نے وہ ضرورت پوری ہوتی نہیں دیکھی۔ پس میں نے اس کے بدلہ تیرے لیے جنت میں یہ ذخیرہ کردیا ہے۔ پس بندہ مومن نے اللہ جو بھی دعا کی ہوگی پروردگار اس کو بیان فرمائیں گے یا تو اس کے لیے دنیا میں پوری کردی ہوگی یا آخرت میں ذخیرہ کردی ہوگی۔ اس مقام پر بندہ کہے گا کاش ! دنیا میں مجھے اپنی کسی دعا کے بدلہ کوئی چیز نہ ملی ہوتی۔ مستدرک الحاکم بروایت جابر (رض)۔
کلام : الضعیفۃ 886 ۔ القدسیہ الضعیفۃ 80 ۔