3407: رات کے آخری حصے کا حکم، اس میں جس قدر ہوسکے نفل نماز پڑھو۔ بیشک اس نماز میں فرشتے حاضر ہوتے ہیں حتی کہ صبح کی نماز کا وقت ہوجائے۔ پھر (نفل سے) رک جا حتی کہ سورج طلوع ہوجائے۔ اور طلوع ہو کر ایک یا دو نیزوں کے بقدر بلند ہوجائے۔ کیونکہ سورج شیطان کے دو سینگوں کے درمیان طلوع ہوتا ہے اور کفار اس کے لیے نماز پڑھتے ہیں۔ پھر (یہ اشراق کا وقت ہے) جو چاہے نماز پڑھے۔ یہ نماز بھی فرشتوں کی حضور کی ہے۔ حتی کہ عصر کی نماز پڑھی جائے۔ (اس کے درمیان سوائے زوال کے وقت کے سارا وقت نوافل کا ہے) ۔ پھر عصر کے بعد (نفل سے) رک جا حتی کہ سورج غروب ہوجائے کیونکہ سورج شیطان کے دو سینگوں کے درمیان غروب ہوتا ہے۔ اور کفار سورج کے لیے نماز پڑھتے ہیں۔ ابو داؤد الکبیر للطبرانی مسدتدرک الحاکم عن عمرو بن عبسۃ۔
فائدہ : حضرت عمرو بن عبسہ نے عرض کیا یا رسول اللہ ! رات کا کون سا حصہ زیادہ دعا سنے جانے کے لائق ہے ؟ تو آپ نے مذکورہ جواب مرحمت فرمایا۔ (مستدرک میں امام حاکم نے یہ اضافہ نقل فرمایا ہے) پھر جب تو وضو کرے تو پہلے ہاتھوں کو اچھی طرح دھو لے، کیونکہ جب تو ہاتھوں کو دھوئے گا تو تیرے (ہاتھوں کے) گناہ تیری انگلیوں کے پوروں سے نکل جائیں گے۔ پھر جب تو اپنا چہرہ دھوئے گا تو تیرے (چہرے کے) گناہ تیرے چہرے سے نکل جائیں گے۔ پھر جب تو کلی کرے گا اور ناک صاف کرے گا تو تیرے نتھنوں سے گناہ نکل جائیں گے پھر جب تو سر کا مسح کرے گا تو سر کے بالوں کے سروں سے گناہ نکل جائیں گے۔ اور جب تو پاؤں دھوئے گا تو پاؤں سے تیرے گناہ نکل جائیں گے۔ پس اگر تو اپنی جگہ بیٹھا رہے تو تیرے وضو کا ثواب رہے گا اور اگر تو اٹھ کر اپنے رب کو یاد کرے اور اس کی حمد وثناء کرے اور دل کی توجہ کے ساتھ دو رکعت نماز پڑھے تو تو اپنے گناہوں سے یوں نکل جائے گا گویا آج تیری ماں نے تجھے جنم دیا ہے۔