٣٦٩٢٦۔۔۔ حضرت جریر (رض) کہتے ہیں جب رسول اللہ (صلی اللہ علیہ وآلہ وسلم) نے پیغام اسلام بھیجا میں آپ کی خدمت میں بیعت کرنے کے لیے حاضر ہوا آپ نے فرمایا : اے جریر تم کیوں آئے ہو ؟ میں نے عرض کیا : میں اس لیے حاضر ہوا ہوں تاکہ آپ کے دست اقدس پر اسلام قبول کروں آپ (صلی اللہ علیہ وآلہ وسلم) نے مجھے دعوت دی کہ میں گواہی دوں کہ اللہ کے سوا کوئی معبود نہیں اور میں اللہ کا رسول ہوں۔ نیز فرمایا : فرض نماز قائم کرو فرض زکوۃ دیتے رہو، اچھی اور بری تقدیر پر ایمان رکھو پھر آپ نے میری طرف اپنی چادر ڈال دی اور صحابہ (رض) کی طرف متوجہ ہو کر فرمایا جب تمہارے پاس کسی قوم کا کوئی شریف آدمی آئے اس کا اکرام کرو۔ (رواہ الطبرانی و ابونعیم)