٣٦٩٤٣۔۔۔ ابن عباس (رض) کی روایت ہے کہ غزوہ احد میں جب حضرت حمزہ (رض) شہید کر دئیے گئے تو ان کی تلاش میں حضرت صفیہ (رض) آئیں انھیں معلوم نہیں تھا کہ حمزہ (رض) کا کیا بنا۔ حضرت علی اور زبیر (رض) سے ان کی ملاقات ہوئی حضرت علی (رض) نے زبیر (رض) سے کہا : اپنی ماں کو بتادو زبیر (رض) نے حضرت علی (رض) سے کہا : نہیں بلکہ تم ہی اپنی پھوپھی کو بتادو ۔ حضرت صفیہ (رض) بولیں۔ حمزہ نے کیا کیا ؟ ان دونوں حضرات نے اتنا کہہ کر انھیں ٹال دیا کہ وہ نہیں جانتے۔ اتنے میں نبی کریم (صلی اللہ علیہ وآلہ وسلم) تشریف لائے اور فرمایا : مجھے صفیہ (رض) کا خوف ہے کہ (حمزہ (رض) کی خبر سن کر) اس کی عقل جاتی رہے گی چنانچہ آپ (صلی اللہ علیہ وآلہ وسلم) نے اپان دست اقدس صفیہ (رض) کے سینے پر رکھا اور ان کے لیے دعا کی صفیہ (رض) نے انا اللہ وانا الیہ راجعون پڑھا اور پھر رونے لگیں۔ نبی کریم (صلی اللہ علیہ وآلہ وسلم) حضرت حمزہ (رض) کی میت کے پاس تشریف لائے جب کہ آپ (صلی اللہ علیہ وآلہ وسلم) کی لاش کا مثلہ کردیا گیا تھا۔ آپ نے فرمایا : اگر عورتوں کی جزع فزع کا خوف نہ ہوتا میں حمزہ (رض) کو یونہی پڑا رہنے دیتا حتیٰ کہ قیامت کے دن انھیں پرندوں کے پیٹوں اور درندوں کے پیٹوں سے اٹھایا جاتا پھر آپ نے شھداء پر نماز جنازہ پڑھنے کا حکم دیا چنانچہ سات میتیں رکھی جاتیں ان کے ساتھ حمزہ (رض) بھی ہوتے آپ (رض) سات تکبیریں کہتے پھر یہ سات اٹھا لیئے جاتے اور حضرت حمزہ (رض) وہیں رکھے رہتے پھر دوسرے سات شہداء لائے جاتے اور ایک حمزہ (رض) ہوتے ان پر آپ ساتھ تکبیریں کہتے یوں اس طرح آپ ان سے فارغ ہوئے۔ (رواہ ابن ابی شیبہ والطبرانی)