٣٦٩٨٩۔۔۔ حضرت انس (رض) کی روایت ہے کہ ایک مرتبہ رسول کریم (صلی اللہ علیہ وآلہ وسلم) مسجد میں تشریف لائے جب کہ حارث بن مالک سو رہے تھے آپ نے حارث (رض) کو پاؤں سے حرکت دی اور فرمایا : اپنا سر اوپر اٹھاؤ، انھوں نے اپنا سر اوپر اٹھایا اور عرض کیا : یارسول اللہ میرے ماں پاب آپ پر قربان ہوں : نبی کریم (صلی اللہ علیہ وآلہ وسلم) نے فرمایا : اے حارث بن مالک ! تم نے صبح کس حالت میں کی ہے ؟ عرض کیا : یارسول اللہ ! میں نے پکے اور سچے مومن کی حالت میں صبح کی ہے۔ ارشاد فرمایا : یقیناً ہر حق کی ایک حقیقت ہوتی ہے تم اپنے ایمان کی کیا حقیقت سمجھے ہو ؟ عرض کیا : میں نے دنیا سے فروتنی برتی ہے اپنا دن پیاسا رکھا ہے اور رات کو جاگتا رہا ہوں گویا میں اپنے رب کے عرش کی طرف دیکھ رہا ہوں گویا میں اہل جنت کی طرف دیکھ رہا ہوں اہل جنت ایک دوسرے کی زیارت کررہے ہیں گویا کہ میں اہل دوزخ کی طرف دیکھ رہا ہوں کہ وہ چیخ و پکار میں لگے ہوئے ہیں نبی کریم (صلی اللہ علیہ وآلہ وسلم) نے ان سے فرمایا : ایسا شخص ہے جس کو اللہ تعالیٰ نے نور سے بھردیا ہے اور تو نے ایمان کی حقیقت پہچان لی ہے لہٰذا اسی کے ساتھ چمٹے رہو۔ (رواہ ابن عساکر)