٣٦٩٩١۔۔۔ حضرت انس (رض) کی روایت ہے کہ ایک مرتبہ رسول کریم (صلی اللہ علیہ وآلہ وسلم) چل قدمی کررہے تھے یکایک سامنے سے انصار کا ایک نوجوان آیا نبی کریم (صلی اللہ علیہ وآلہ وسلم) نے اس سے فرمایا : حارث تم نے صبح کس حال میں کی ہے عرض کیا : میں نے مومن حق (پکے سچے مومن) کی حالت میں صبح کی ہے فرمایا : ذرا غور کرو کیا کہہ رہے ہو چونکہ ہر بات کی ایک حقیقت ہوتی ہے۔ عرض کیا : یارسول اللہ ! میں نے اپنے آپ کو دنیا سے الگ تھلگ رکھا ہے رات بیدار رہتے ہوئے گزاری ہے اور دن کو پیاسا رہا ہوں۔ (یعنی رات بھرعبادت کرتا رہوں اور دن کو روزہ رکھا ہے) گویا میں ظاہر و باہر اللہ تعالیٰ کے عرش کو دیکھ رہا ہوں گویا میں اہل جنت کو آپس میں ملاقات کرتے دیکھ رہا ہوں اور گوہا اہل دوزخ کو دوزخ میں چیخ و پکار کرتے دیکھ رہا ہوں آپ نے فرمایا : تمہیں بصیرت مل چکی ہے لہٰذا اس کو لازم رکھو (بلاشبہ تو ایسا) بندہ ہے جس کے دل کو اللہ تعالیٰ نے ایمان سے بھر دیا ہے۔ عرض کیا : یارسول اللہ ! آپ میرے لیے شہادت کی دعا کریں رسول اللہ (صلی اللہ علیہ وآلہ وسلم) نے ان کے لیے دعا کی چنانچہ ایک دن شہسواروں میں اعلان کیا گیا حارث (رض) سب سے پہلے گھوڑے پر سوار ہوئے اور معرکہ میں وہ پہلے شہسوار ہیں جنہیں شہادت ملی جب ان کی والد کو شہادت کی خبر ملی۔ وہ رسول اللہ (صلی اللہ علیہ وآلہ وسلم) کی خدمت میں حاضر ہوئی اور عرض کیا : یارسول اللہ ! میرا بیٹا اگر جنت میں ہے تو پھر میں نہیں روؤں گی اور اس پر غم بھی نہیں کروں گی اور اگر دوزخ میں ہے جب تک زندہ رہوں گی روتی رہوں گی آپ (صلی اللہ علیہ وآلہ وسلم) نے فرمایا : اے ام حارث ! وہ کوئی ایک باغ نہیں بلکہ جنت بیشمار باغات ہیں اور حارث فردوس بریں میں ہے چنانچہ ام حارث (رض) ہنستی ہوئی واپس لوٹیں اور کہہ رہی تھیں : اے حارث تجھے مبارک ہو۔ (رواہ ابن النجار وفیہ یوسف بن عطیۃ)