٣٧٠٠٣۔۔۔” مسند ابی مسلم حارث بن مسلم تمیمی (رض) “ عبدالرحمن بن حسان کنانی، مسلم بن حارث بن مسلم تمیمی (رض) سے مروی ہے کہ ان کے والد حارث بن مسلم (رض) نے انھیں حدیث سنائی کہ رسول کریم (صلی اللہ علیہ وآلہ وسلم) نے انھیں ایک سریہ کے ہمراہ روانہ کیا۔ جب ہم مطلوبہ جگہ کے قریب پہنچے میں نے اپنا گھوڑا تیز رفتار کردیا اور اپنے ساتھیوں سے آگے بڑھ گیا چنانچہ بستی والوں کو آہ وبکاء کرتے ہوئے پایا میں نے اہل بستی سے کہا : لاالہ الا اللہ کہہ دو جان بچالو گے بستی والوں نے کلمہ پڑھ لیا اتنے میں میرے ساتھی بھی پہنچ گئے انھوں نے مجھے ملامت کی اور کہا : وہ غنیمت جو ہمارے ہاتھوں میں آچکی تھی اس سے تم نے ہمیں محروم کردیا ہے جب ہم واپس لوٹے ہم نے اس واقعہ کا رسول اللہ (صلی اللہ علیہ وآلہ وسلم) سے تذکرہ کیا آپ (صلی اللہ علیہ وآلہ وسلم) نے مجھے اپنے پاس بلایا اور میری اس کارروائی پر مجھے خراج تحسین پیش کیا اور فرمایا : خبردار ! اللہ تعالیٰ نے بستی والوں کے ہر انسان کے بدلہ میں تمہارے نامہ اعمال میں فلاں اور فلاں نیکیاں لکھ دی ہیں۔ عبدالرحمن (رض) بولے : اس کا سبب میں بناہوں۔ پھر رسول اللہ (صلی اللہ علیہ وآلہ وسلم) نے مجھ سے فرمایا : میں تمہارے لیے ایک نوشتہ تحریر کرتا ہوں اور میرے بعد مسلمانوں کے آنے والے ائمہ (حکمرانوں) کو تمہاری وصیت کرتا ہوں چنانچہ آپ نے نوشتہ تحریر کیا اور اسے سربمہر کرکے میرے حوالے کردیا مجھے آپ نے وصیت کی : جب صبح کی نماز پڑھو تو کلام کرنے سے قبل سات مرتبہ یہ کلمات پڑھو ” اللھم اجرنی من النار “ اگر تم اسی دن مرگئے تمہیں عذاب نار سے پناہ مل جائے گی، اور جب مغرب کی نماز پڑھو تب بھی کلام کرنے سے قبل سات مرتبہ ” اللھم اجرنی من النار “ پڑھو اگر تم اس رات مرگئے اللہ تعالیٰ تمہیں عذاب ناز سے پناہ دے دے گا حضرت حارث بن مسلم (رض) کہتے ہیں کہ جب رسول اللہ (صلی اللہ علیہ وآلہ وسلم) دنیا سے رخصت ہوگئے میں حضرت ابوبکر (رض) کی خدمت میں وہ نوشتہ لے کر حاضر ہوا آپ (رض) نے مہر توڑی اور نوشتہ پڑھا آپ نے میرے لیے مال کا حکم دیا اور نوشتہ پر مہر لگا کر میرے حوالے کردیا۔ میں یہ نوشتہ لے کر حضرت عمر (رض) کے پاس آیا آپ نے بھی یہی کچھ کیا : ان کے بعد میں حضرت عثمان (رض) کے پاس آیا انھوں نے بھی میرے ساتھ یہی معاملہ کیا حضرت حارث (رض) نے عثمان (رض) کے دور خلافت میں وفات پائی مسلم بن حارث کہتے ہیں نوشتہ ہمارے پاس محفوظ تھا حتیٰ کہ عمربن عبدالعزیز کا دور خلافت آیا عمربن عبدالعزیر (رح) نے ہمارے متعلق اپنے عامل کو حکم لکھا کہ مسلم بن حارث تمیمی کا وہ خط جو رسول اللہ (صلی اللہ علیہ وآلہ وسلم) نے اس کے والد کے لیے لکھا تھا اس کی تعیین کرو چنانچہ میں نے وہ خط عمر بن عبدالعزیز (رح) کو بھیج دیا انھوں نے میرے لیے مال کا حکم دیا اور خط پر مہر لگائی۔ (رواہ الحسن بن سفیان و ابونعیم)