٣٧١٢٨۔۔۔ حضرت سلمان (رض) فرماتے ہیں : میں عظماء فارس کے بیٹوں میں سے ہوں میرا شمار کاتبین میں تھا میری معیت میں دو غلام تھے یہ غلام جب اپنے معلم سے واپس لوٹتے راستہ ایک راہب کے پاس جاتے ایک دن میں بھی ان کے ساتھ راہب کے پاس چلا گیا راہب بولا : کیا میں نے تمہیں منع نہیں کیا تھا کہ میرے پاس صرف ایک آدمی آیاکرو، اس کے بعد میں راہب کے پاس آنا جانا شروع کردیا اور یوں میں غلاموں کی نسبت راہب کو زیادہ محبوب ہوگیا۔ راہب نے مجھے کہا تم سے گھروالے تاخیر کی بابت پوچھیں کہہ دو : معلم نے مجھے تاخیر کردی اگر معلم پوچھے کہہ دو گھروالوں نے تاخیر کردی کچھ عرصہ کے بعد راہب نے وہاں سے کوچ کرنے کا ارادہ کرلیا میں نے کہا : میں بھی تمہارے ساتھ جاؤں گا چنانچہ میں بھی اس کے ساتھ ہولیا اور ہم ایک بستی میں جاپہنچے وہاں ایک عورت راہب کے پاس آتی جب راہب کی وفات کا وقت قریب ہوا س نے کہا : اے سلمان ! میرے سر کے پاس ایک گڑھا کھود میں نے گڑھا کھودا گڑھے سے درہموں بھرا ایک مٹکا برآمد ہوا راہب نے مجھے حکم دیا یہ دراہم میرے سینے پر بہادر میں نے دراہم اس کے سینے پر بہادیئے وہ کہتا جارہا میرے اعتماد واقتناء کی ہلاکت پھر وہ مرگیا۔ اس کے بعد میں نے دوسرے راہبوں سے کہا : مجھے کوئی ایسا عالم شخص بتاؤ جس کی میں پیروی کرلوں ؟ راہبوں نے ایک شخص کا مجھے بتایا، میں اس کے پاس آگیا اور اس سے کہا : میں صرف حصول علم کے لیے تیرے پاس آیاہوں۔ راہب بولا اللہ کی قسم ! سوائے ایک شخص کے میں کسی کو نہیں جانتا جس کا سرزمین تیماء میں ظہور ہونے والا ہے۔ اگر تم ابھی جاؤ ےتو اس سے مل سکتے ہو۔ یاد رکھو اس میں تین نشانیاں ہیں۔ ہدیہ کھالیتا ہے صدقہ نہیں کھاتا اور دائیں کاندھے کی ہڈیوں کے جو ڑپر مہرنبوت ہے کو کبوتری کے انڈے کے مشابہ ہے اس کا رنگ کھال کا رنگ ہے ، چنانچہ میں حق کی تلاش میں چل پڑا اور گنواروں کی بستی پر سے میرا گزرہوا انھوں نے میرا گزرہو انھوں نے مجھے پکڑ کر غلام بنالیا اور پھر مجھے بیچ ڈالا، حتیٰ کہ اہل مدینہ کی ایک عورت نے مجھے خرید لیا میں نے مدینہ میں لوگوں کو نبی کریم (صلی اللہ علیہ وآلہ وسلم) کا تذکرہ کرتے ہوئے سنا میں نے اپنی مالکن سے کہا : مجھے ایک دن کی اجازت دو وہ مان گئی ، میں نے لکڑیاں جمع کیں اور انھیں بیچ کر کھاناپکایا اور کھانا لے کر نبی کریم (صلی اللہ علیہ وآلہ وسلم) کی خدمت میں حاضر ہوگیا، کھانا تھوڑا تھا میں نے آپ کے سامنے رکھ دیا، آپ نے پوچھا : یہ کیا ہے ؟ میں نے عرض کیا : یہ صدقہ ہے آپ نے اپنے صحابہ (رض) سے فرمایا : یہ کھاؤ جب کہ آپ نے خود نہیں تناول فرمایا میں نے سوچا ایک نشانی صحیح ثابت ہوئی۔ پھر کچھ عرصہ بعد میں نے اپنی مالکہ سے کہا مجھے ایک دن کی اجازت دو اس نے کہا : جی ہاں میں نے لکڑیاں جمع کیں اور انھیں بیچ کر کھاناتیار کیا اور اسے آپ کے پاس آپ کے پاس لے آیا آپ (صلی اللہ علیہ وآلہ وسلم) اپنے صحابہ (رض) کے درمیان تشریف فرما تھے میں نے کھانا آپ کے سامنے رکھ دیا آپ نے پوچھا یہ کیا ہے ؟ میں نے عرض کیا : یہ ہدیہ ہے۔ آپ نے تناول فرمانے کے لیے اپنا ہاتھ رکھ دیا اور صحابہ سے بھی کھانے کو فرمایا : میں آپ کے پیچھے کھڑا ہوگیا آپ فورا سمجھ گئے اور اپنی چادر کاندھے سے اتاردی میں نے جو آنکھ اٹھا کر دیکھا مہر نبوت کو سامنے پایا میں نے کہا : میں گواہی دیتا ہوں کہ آپ اللہ کے رسول ہیں ، آپ نے فرمایا : یہ کیا ہے ؟ میں نے اپنے ساتھی شخص کا واقعہ سنایا پھر میں نے عرض کیا : یارسول اللہ ! (صلی اللہ علیہ وآلہ وسلم) وہ جنت میں داخل ہوگا ؟ چونکہ اسی نے مجھے بتایا ہے کہ آپ نبی ہیں۔ آپ نے فرمایا : جنت میں صرف مسلمان شخص ہی داخل
ہوگا۔ (رواہ ابن ابی شیبۃ)